Áleýmettik osal otbasynan shyqqan balalardy qoldaýdyń jańa tetikteri týraly Bilim jáne ǵylym mınıstri Ashat Aımaǵambetov óziniń facebook áleýmettik jelisindegi resmı paraqshasynda jazdy.
«Kóptegen zertteý daryndy oqýshylardy ǵana emes, sonymen qatar áleýmettik osal toptaǵy balalardy da qoldaýdyń mańyzdylyǵyn kórsetedi. Joǵary oqý oryndaryna irikteý júıesi, ýnıversıtet granttaryn bólý, daryndy balalarǵa arnalǵan arnaıy mektepter, túrli olımpıadalar, baıqaýlar ótkizýde, pedagogterdi baǵalaý kezinde de úlgerimi nashar oqýshylarmen jumys istegenine emes, dástúrli túrde jetistikke jetken oqýshylarynyń nátıjesine nazar kóbirek aýdarylady. Árıne, muny emtıhan tapsyryp, eń joǵary ball alǵandyqtan ádil deýge bolady. Biraq ata-analar daryndy balalarǵa arnalǵan mektepterge túsý úshin repetıtor kómegine júginip jatatyny da belgili. Ádette áleýmettik-ekonomıkalyq jaǵdaıy tómen otbasylardyń múmkindikteri birdeı emes. Bul merıtokratııanyń (áleýmettik-ekonomıkalyq jaǵdaıyna qaramastan qabiletti adamnyń jetekshilik etýin talap etetin basqarý qaǵıdasy) «qarańǵy» tusy», deıdi A.Aımaǵambetov.
Mınıstrdiń oıynsha, irikteý barlyǵyna teń jáne ádil bolýy kerek, biraq irikteý júıesi áli de tolyqtyrýdy qajet etedi. Sondaı-aq bul jerde merıtokratııa men ınklıýzıvtiliktiń tepe-teńdigin saqtaý mańyzdy. Osyǵan baılanysty mektepterde, kolledjder men ýnıversıtetterde osy máseleni teńestirý úshin ózgerister júzege asyrylmaq.
«Bıyl biz áleýmettik osal otbasy balalary úshin mamandandyrylǵan mektepterge túsýge jańa 15%-dyq kvota engizý týraly sheshim qabyldadyq. Iаǵnı endi osyndaı otbasynan shyqqan 2 myńnan asa bala jańa kvota boıynsha BIL, Daryn jáne t.b mektepterge oqýǵa túse alady. 15% degen kóp emes. Sol sebepti mamandandyrylǵan oqý oryndary basshylaryna mektepterdiń nátıjelerine áser etedi dep alańdaýǵa negiz joq. Osyǵan qosa «Sandyq (sıfrly) repetıtor» jobasyn engizip jatyrmyz. Jańashyldyqtyń maqsaty – áleýmettik osal otbasynan shyqqan balalarǵa (500 myńǵa jýyq oqýshy) apta saıyn tegin matematıka, til nemese jaratylystaný pánderinen keminde 3 qosymsha sabaq alý múmkindigin berý. Biz «Qazaqstan halqy» qorynan osy jobany qarjylandyrýǵa qoldaý kórsetýdi suradyq», deıdi vedomstvo basshysy.
A.Aımaǵambetovtiń aıtýynsha, bıyl respýblıkalyq bıýdjetten qosymsha 45 myń grant bólindi. Bul bilimmen qamtýdy arttyrý maqsatynda ákimdikter men jergilikti kolledjderge beriledi. Ákimdikterdiń qarjylandyrýy jetkiliksiz bolǵandyqtan, kóbi kolledjde oqýǵa tegin grant ala almaǵan. Osylaısha, kolledjderge bólingen jalpy grant 125 myńǵa kóbeıdi.
«Byltyr granttardy bólý kezinde biz alǵash ret áleýmettik osal otbasynan shyqqan balalarǵa ýnıversıtette oqýǵa kvota engizdik. Osynyń nátıjesinde ótken jyly múmkindigi az bolǵandarǵa endi memleket esebinen bilim alý múmkindigi aıtarlyqtaı artty. Osy stýdentterdiń birinshi oqý jylynyń nátıjesin jáne osyndaı sheshimniń tıimdiligin kórip, bolashaqta bul kvotany odan ári ulǵaıtyp, jalpy grant sanynyń 15%-yna jetkizýdi jón kórdik. Iаǵnı halyqtyń áleýmettik osal toptarynan shyqqan taǵy 5 myń bala memlekettik bıýdjette oqýǵa múmkindik alady. Sonymen qatar osy jyly aýyl mektepteri túlekteriniń joǵary bilim alýǵa qoljetimdiligin qamtamasyz etý maqsatynda olardyń kvotasyn 35 paıyzǵa deıin ulǵaıtyp jatyrmyz», dedi mınıstr.
