Oqıǵa keshe boldy. Aqtóbe qalasyndaǵy Janqoja batyr kóshesinde turatyn 9 jastaǵy bala aýladan shyǵyp, oınap ketken. Keıin ata-anasy polısııaǵa qońyraý shalǵan. 102 nómirine habarlama saǵat 23:31-de túsken. Birden izdestirý jumysy bastaldy.
«Polısııa qyzmetkerleri keshendi izdestirý sharalaryn júrgizip, balanyń bolýy múmkin jerlerdi qarap shyqty. Kámeletke tolmaǵandar isi jónindegi polısııa ınspektorlary elevator ǵımaratyn tekserip, tereńdigi 10 metr bolatyn rezervýardan tapty. Jaǵdaıy óte nashar boldy. Polısııa qyzmetkerleri men qutqarýshylar balany rezervýardan kóterip shyǵardy. Kámeletke tolmaǵan bala balalar aýrýhanasynyń jansaqtaý bólimine jatqyzyldy. Aqtóbe oblysy PD ata-analardan balalardy qaraýsyz qaldyrmaýdy suraıdy. Balalarǵa qurylys alańdary men qaraýsyz qalǵan ǵımarattar aýmaǵynda júrýdiń erejesin úıretý kerek. Ata-analar balalarynyń qaı ýaqytta, qaı jerde júrgenin baqylaýy qajet», dedi oblystyq PD baspasóz qyzmetiniń jetekshisi Erbolat Sarqulov.
Aqtóbe oblystyq balalar aýrýhanasy bas dárigeriniń orynbasary Saǵıdolla Dosmaǵambetovtiń aıtýynsha, túnde aýrýhanaǵa jetkizilgen balanyń jaǵdaıy aýyr.
«Balany jedel járdem brıgadasy es-túzsiz jetkizdi. Ony birden jansaqtaý bólimine jatqyzyp, neırohırýrg, travmatolog, hırýrg jáne reanımatolog qarady. Tońyp qalǵan. KT-ǵa túsirgen soń dıagnoz qoıyldy. Jabyq bas-mı jaraqatyn alǵan. Birneshe súıegi synǵan. Búıregi zaqymdanǵan. Jambas súıegi synǵan. Balanyń jaǵdaıy aýyr. Jasandy tynys alý apparatyna qosyldy», dep habarlady oblystyq Densaýlyq saqtaý basqarmasynan.
