«Elimiz úshin tarıhı oqıǵaǵa aınalǵan referendým respýblıka boıynsha joǵary deńgeıde ótti. On jeti óńirdegi ókildikterimiz ben baıqaýshylarymyz birinshi kezekte saıası naýqannyń ádil ótýine múddeli boldy. Jalpy 10 myńǵa jýyq referendým ýchaskesine barǵan bizdiń 20 myńǵa jýyq baıqaýshymyz saıası naýqanda eshqandaı ereje buzý deregi tirkelmegenin habarlady. Biz baıqaýshylardy bul naýqanǵa barlyq talaptarǵa saı daıyndadyq. Olar óz kezeginde jumysty sapaly atqardy», dedi qoǵamdyq birlestik tóraǵasy jaǵdaıdy túsindirip.
Tólegen Kúnádilovtiń aıtýynsha, ár okrýgte eki baıqaýshy óz mindetin talapqa saı jaýapkershilikpen atqarǵan. Al baıqaýshylardyń ortasha jasy 44 jas eken.
«Barlyq óńirdegi ýchaskelerge barǵan baıqaýshylarymyz tańǵy saǵat altydan referendým aıaqtalǵanǵa deıin tynymsyz jumys istep, der kezinde málimet berip otyrdy. Bir qyzyǵy, Qaraǵandy men Shyǵys Qazaqstan oblysynda túski 15.00-16.00 aralyǵynda saılaýshylar 100 paıyz daýys bergen ýchaskeler anyqtaldy. Árıne, atalǵan ýchaskeler eldi mekenderde ornalasqandyqtan, saılaýshylardyń sany da kóp emes. Sodan da bolsa kerek, halyq erterek kelip, azamattyq boryshyn oryndaǵan», dedi ol óz oıymen bólisip.
Baspasóz máslıhatynyń sońynda qoǵamdyq uıymnyń jetekshisi birlestik aldaǵy ýaqytta da saıası naýqandarǵa belsene qatysýǵa nıetti ekenin jetkizdi.
