Jetinshi shaqyrylǵan SQO máslıhatynyń kezekten tys XVII sessııasynda oblystyq bıýdjettiń oryndalý jaǵdaıy baıandaldy. Jıyn barysynda SQO boıynsha revızııalyq komıssııa tóraǵasy Tilegen Qaskın komıssııa qyzmetiniń negizgi kórsetkishterine toqtaldy.
Onyń aıtýynsha, ótken jyly 55 nysanda 15 aýdıtorlyq jáne 6 saraptamalyq-taldaý is-sharalary júrgizilip, 99 mlrd teńge qamtyldy. Sonyń 6,2 mlrd teńgesi boıynsha birqatar zańbuzýshylyq anyqtaldy. Onyń ishinde 4,9 mlrd teńge qarjylyq zańbuzýshylyqtar bolsa, 716,2 mln teńge bıýdjet qarajaty tıimsiz paıdalanylǵany anyqtaldy.
Budan basqa 33,7 mln teńge somasynda bıýdjettiń tikeleı shyǵyndary, 314 rásimdik buzýshylyqtar, 4 júıelik buzýshylyqtar anyqtaldy.
«Bıýdjet qarajatyn jumsaýǵa qatysty zańbuzýshylyqtardyń negizgi somasy 5,9 mlrd teńgeni quraǵan. Búgingi kúni 4,6 mlrd teńge nemese 95%-y bıýdjetke qaıtaryldy. Mamandar negizinen býhgalterlik esep júrgizý kezinde zańbuzýshylyqtarǵa jol bergen», dedi revızııalyq komıssııa tóraǵasy.
Revızııalyq komıssııasy ótkizgen aýdıtorlyq is-sharalardyń qorytyndysy boıynsha 86 usynym men tapsyrma berilgen. Aýdıt qorytyndysy boıynsha 284 tulǵa jaýapqa tartyldy, onyń ishinde 170-i ákimshilik jaýapkershilikke, 114-i tártiptik jaýapkershilikke tartylsa, 69-y eskertý, 38-i sógis, 6-ýy qatań sógis alyp, 1 adam jumystan bosatyldy.
