Bankterdiń qaryz portfeli qalaı ózgerdi?

«Degenmen nesıe bel­sen­di­li­giniń jalpy quldy­ra­ýy fonynda birqatar ekinshi deń­geıli bank belsendi ósim dınamıkasyn saqtady. Kredıtor bankterdiń ondyǵynda Bank RBK senimdi kósh bastap tur: qarjy ıns­tı­týtynyń qa­ryz portfeli sá­ýir aıynda 11,5 paıyzǵa ósip, 746,6 mlrd teńgege jetken. Jyl­dyq dınamıkada bank nesıe berý kórsetkishin 43,6 pa­ıyz deńgeıinde ósirgen. Bul – sek­tor­daǵy eń myqty dınamıka. Ekinshi orynda – bir aıda qaryz portfelin 10,4 paıyzǵa, 1,45 trln teńgege ulǵaıtqan «Bank SentrKredıt». Banktiń jyl­dyq dınamıkadaǵy kór­setkishi de optımıstik jaǵ­daıda (+31 pa­ıyz). Úshtikti bir aıda qaryz portfelin 8,8 paıyz nemese 872,2 mlrd teńgege deıin kóbeıtken «Eýrazııalyq bank» túıindeıdi. Bir jylda bank za­ımy 35,8 paıyzǵa ósim kórsetti», dep jazady Ranking.

Aılyq dınamıkadaǵy tómen­deýge qaramastan bank ataýly­nyń jıyntyq qaryz portfeli oń kórsetkishte tur: 26,7 paıyzǵa kóbeıgen. Portfel sapasy da táp-táýir. Tólenbegenine 90 kúnnen asqan (NPL 90+) «nashar kredıtterdiń» jalpy zaım kólemindegi úlesi 3,6 paıyzdy quraıdy. Salystyrar bolsaq, bir jyl buryn «nashar nesıeler» – 7,6, on jyl buryn – 32,3 paıyz bolǵan.

Jekeleı alyp qarastyrar bolsaq, nesıe berý úlesi bo­ıynsha jetekshi bankterdiń de zaım sapasyn jaqsartýdaǵy oń qadamdary baıqalady. NPL 90+ Bank RBK-da 2,4 paıyzdy quraıdy. Bir jyl buryn – 8,7, bir aı buryn 2,72 paıyz bolǵanyn eskersek, kádimgideı sapaǵa jumys istegenderi kóri­ne­di. Zaım sapasyn da saq­tap otyr jáne klıentterge nesıe usyný yqylasy da jo­ǵa­ry. Qazir qarjy ınstıtýty tuty­nýshylarǵa 10 mln teńgege de­ıin­gi kepilsiz zaımdar berýge daıar. Kredıt boıynsha stavka 8 pa­ıyz­dan, JTSM 21,6 paıyzdan bastalady. Nesıe merzimi – 6-84 aı aralyǵynda.

«Bank SentrKredıt» te 90 kúnnen asyp tólenbegen bereshekter mólsherin birshama azaıtqan – naýryzdaǵy 5,06 paıyzdan sáýirdegi 4,48 paıyzǵa deıin. Bul qarjy uıymyndaǵy «nashar kredıt» mólsheri bir jyl buryn ǵana 6,91 paıyz bolǵan. Bir aılyq dınamıkada «Eýrazııalyq bank» te NPL 90+ kólemin azaıtqan, biraq jalpy deńgeıi áli de bolsa 6,67 paıyz deńgeıinde tur. Qaıta bul tómendegeni, bir aı buryn jalpy nesıe portfelindegi qaı­ta­ryl­maı jatqan bereshekter 7,43 paıyzdy qurasa, bir jyl buryn 8,7 paıyzdy mańaılapty.

Qarjy ınstıtýttaryndaǵy jeke tulǵalardyń salymy sáýirde 280,5 mlrd teńgege aza­ıyp­ty. 1 mamyrdaǵy jaǵdaı bo­ıynsha bankterdegi jeke tul­ǵalar depozıtiniń kólemi 12,83 trln teńge bolyp tur. Qyzmet etip turǵan 22 banktiń 9-ynda salymdar ájeptáýir azaı­ǵan. Halyqtyń aqshasyn jınaý jaǵynan absolıýtti lıder ataǵyna Kaspi ıe. Sáýirde bul banktiń qoryna 120,1 mlrd teńge kelip qosylyp, jalpy jıyntyǵy 2,6 trln teńgege jetken. «Bank SentrKredıt» sáýirde 886 mlrd teńge salym jıǵan. Jalpy kórsetkish tur­ǵysynan sektordaǵy úzdik ondyqqa da kirmeıtin «Frıdom Fınans Qazaqstan» salym ósimi boıynsha úshinshi orynda tur. Qarjy ınstıtýtynyń depozıt portfeli bir aıda 12,8 mlrd teńgege ósip, 62,5 mlrd teńgeni qurady.