Qazaqstanda balalar úıi bolmaýy tıis

ASTANA. 22 sáýir. Jetim jáne ata-anasynyń meıirimine zárý, qaraýsyz qalǵan balalardy patronatty tárbıeleýshilerge berý kerek. Parlament Májilisinde ótken «dóńgelek ústelde» osyndaı oı qozǵaldy. Bul týraly «Ekspress K» habarlady. Jıyndy basqarǵan Parlament Májilisiniń depýtaty Zaǵıpa Balıeva balalar úıine bólinetin áleýmettik tólemderdi patronatty tárbıeleýshilerge usynǵan jón degen pikirin jetkize otyryp: «Biz balalar úılerin panalap otyrǵan balalardy asyraýǵa qaralǵan qarjyny qaıta baǵdarlaýdy usynamyz. Qazirgi tańda 14 balalar úıi jabyldy», – dedi. Jańa zań boıynsha, patronatty tárbıeleýshiler tólemaqynyń 20 paıyzyn memlekettik bilim berý jınaqtaýshy qoryna tapsyrýy kerek. Qarajattyń 40 paıyzyn baspana alý depozıtine jiberip, qalǵany kıim-keshek pen azyq túlikke jaratylady. Jyl saıyn tárbıeleýshiler qamqorlyq jáne qorǵaý organdaryna bul qarjylardyń qalaı jaratylǵany jaıly esep berýi tıis. Eger asyrap alýshylar bala kámeletke tolǵansha óz mindetterin oryndasa, olar jer, kólik, jyljymaıtyn múlikke salynatyn salyqtardan bosatylady. Zaǵıpa Balıeva basqosýda Prezıdent janynan balalar quqyǵyn qorǵaýmen aınalysatyn arnaıy mekeme ashylýy qajettigin de sóz etti. Onyń oıynsha, bul mekeme balalar isine baılanysty memlekettik oryndardy jumyldyryp ári asyrap alýshylarǵa jaǵymdy aýra qalyptastyrady. «Dóńgelek ústelde» Parlament Májilisi tóraǵasynyń orynbasary Darıǵa Nazarbaeva jetim balalar týraly málimetter jınaqtaıtyn qor qurýdy  usyndy. Onyń aıtýynsha, mundaı ózgerister asyrap alý úrdisin ashyq júrgizýge septigin tıgizedi. Sonymen qatar, Darıǵa Nazarbaeva: «Bala asyrap alǵysy kelgen jan ózi týraly málimetterdi onlaın arqyly bergeni jón. Iаǵnı, ol ózinen talap etiletin qajetti qujattardy jınaqtaý kezinde eshqandaı sheneýniktiń aldyna barmaıdy. Bul jaǵdaıda is barysy taza júredi», – dedi. Basqosýda «Qaıyrymdylyq» erikti qoǵamy» qorynyń dırektory Arýjan Saın elimizdegi jetim jáne qaraýsyz qalǵan balalar jóninde maǵlumattardyń az ekenine qynjylysyn bildirdi. Onyń sózine qaraǵanda, «Qaıyrymdylyq» erikti qoǵamy» qory Balalardyń quqyqtaryn qorǵaý komıtetimen birlese jumys istepti. Sonyń nátıjesinde jetim jáne qaraýsyz balalar týraly birshama málimet jınaqtalǵan. Asyrap alýshylar osynyń kómegimen  213 búldirshindi óz kútimderine alǵan. Qazirgi tańda álgi málimetter qorynda 4 700 balanyń anketalary bar kórinedi. Al Arýjan Saın mundaı derekterdi 10 myńǵa jetkizý kerek dep esepteıdi. Joldybaı Bazar. Derekkóz: «Ekspress K». Foto: THENEWS.kz.