Bas prokýratýranyń resmı ókili Darhan Dúısembaı sońǵy kezderi azamattardyń eldi mekender mańyndaǵy turmystyq jáne óndiristik qaldyqtardyń zańsyz shyǵarylýy týraly aryz-shaǵymdar jıilep ketkenin aıtady.
Kelip túsken aryz-shaǵymdar boıynsha Bas prokýratýra ýákiletti organdardyń tabıǵatty qorǵaý salasynda ekologııalyq zańnamalardyń saqtaýyna tekserý júrgizgen. Tekserý is-sharalary kezinde prokýrorlar kásiporyndardyń óndiristik qaldyqtardy óńdeýsiz ruqsat etilmegen jerlerge tógýine qatysty 43 faktini anyqtap, tirkedi. «Mysaly, Aqtóbe ferroqorytpa zaýyty ekologııalyq turǵydan ruqsaty joq kásiporyndarǵa 150 myń tonnaǵa jýyq qaýipti qaldyqtardy ótkizgen. Al kásiporyndar bolsa, sol qaldyqtardy óńdeýsiz qaladaǵy bos jatqan jerlerge tastaǵan. Búgingi kúnde kináli tulǵalar ákimshilik jaýapkershilikke tartyldy. Olardan 80 mln teńgeden astam shyǵyn óndirildi. Oǵan qosa, zaýytqa qorshaǵan ortaǵa emıssııa túrinde 1 mlrd 600 mln teńge kóleminde tólemaqy esepteldi», deıdi Bas prokýratýranyń resmı ókili.
Ruqsat etilmegen polıgondardyń kólemi de azaımaýda. «Qazaqstan Ǵarysh Sapary» mekemesiniń ǵaryshtyq baqylaý nátıjesine sáıkes, óńirlerde jyl saıyn 9 myńǵa jýyq jańa polıgon anyqtalady. Mysaly, Almaty qalasynyń prokýratýrasy Alataý, Medeý jáne Túrksib aýdandarynan 17 kommýnaldyq jáne óndiristik qaldyqtar kómilgen jerdi tapqan. Qazirgi kezde prokýratýranyń talaby boıynsha qoqys polıgondary joıyldy.
Jalpy tekserý qorytyndysy boıynsha, Aqtóbe, Almaty, Qyzylorda, Pavlodar, Shyǵys Qazaqstan oblystary jáne Almaty qalasy boıynsha Ekologııa departamentteriniń basshylary, sondaı-aq profıldi mınıstrliktiń laýazymdy tulǵalary tártiptik jaýapkershilikke tartylyp, tabıǵat qorǵaý ınspektorlary bıýdjetke 33 mlrd teńgege jýyq ekologııalyq shyǵyndy, sondaı-aq 12 mlrd teńge kólemindegi ákimshilik aıyppuldy óndirgen. Tıisinshe Úkimetke zań buzýshylyqtardy joıý týraly usynys engizilip otyr. Bul is-sharalardyń barlyǵy qoǵamnyń, atap aıtqanda óndiristik qaldyqtardy qalaı bolsa solaı qaldyryp kete beretin kásiporyndardyń qorshaǵan ortany saqtaýǵa degen jaýapkershiligin arttyrýǵa baǵyttalyp otyr.
