Kúsheıtilgen rejımde uıymdastyrylǵan tekserý kezinde Túrkistan oblysynda sońǵy úsh kúnde jolǵa qatysty 3500-ge tarta quqyq buzýshylyq anyqtalǵan. Onyń ishinde qurylys zattaryn tasymaldaý kezinde qaýipsizdikti saqtamaǵan, tyıym salǵan aımaqqa kirip, jol belgilerine baǵynbaǵan júk kóliginiń júrgizýshileri anyqtaldy.
Máselen, Keles aýdany Jibek joly – Gagarın – Jetisaı – Saryaǵash tas jolynyń 162-shaqyrymynda qum tıep alǵan, alaıda qumnyń ústin arnaıy japqyshpen jappaǵan Howo markaly kóligi toqtatyldy. Osylaısha júk tasymaldaý qaǵıdasyn buzǵan júrgizýshige QR ÁQBtK-niń 593-baby 1-bóligimen (Jolaýshylardy jáne júkterdi tasymaldaý qaǵıdalaryn saqtamaý) hattama toltyryldy.
Sondaı-aq, tártip saqshylary qala ishinde júk kólikterimen júrip, jol erejesin buzǵandardy anyqtaý maqsatynda Túrkistan qalasy B. Jarylqapov kóshesi boıynda birneshe quqyq buzýshylyqty anyqtady. Qurylys zatyn artyp, alaıda ústine japqysh jappaǵany úshin Howo Sinotrik júk kóliginiń ıesi jaýapqa tartyldy. Dál osy kóshede polıseıler memlekettik tirkeý nómiri joq júk kóligin baıqap, ony birden toqtatty. Kóliktiń nómiri óz ornynda emes, ishki salonynda turǵan. Osy úshin júrgizýshisi QR ÁQBtK-niń 590-baby 1-bóligimen (Memlekettik tirkeý nómiri belgileri (belgisi) oqylmaıtyn nemese ulttyq standarttyń talaptaryna sáıkes kelmeıtin nemese belgilengen oryndardan tys jerde ornatylǵan, tirkelgen kólik quralyn basqarý) jaýapqa tartyldy.
Úshinshi quqyq buzýshynyń júk kóliginen júrgizýshi jaq betindegi áıneginiń jarylýy anyqtalyp, QR ÁQBtK-niń 590-baby 5-bóligimen (Tehnıkalyq reglamentterdiń, ulttyq standarttardyń talaptaryna saı kelmeıtin, sondaı-aq kólik quraldaryn paıdalanýǵa tyıym salynatyn aqaýlary men jaǵdaılar bar kólik quraldaryn basqarý) hattama toltyryldy.
Odan bólek oblys ortalyǵyndaǵy Qyzylorda kóshesinde KamAZ júk kóliginiń júrgizýshisi kólikti kýáliksiz basqarǵan, jol tańba belgilerin saqtamaǵany anyqtalyp, oǵan QR ÁQBtK-niń eki birdeı babymen, ıaǵnı 612-baby 2-bóligimen, 601-babynyń 1-bóligimen ákimshilik sharasy kórildi. Túrkistan oblysynyń polıseıleri júk kólikteriniń júrgizýshilerine temir tulparlaryn qala ishinde tyıym salynǵan aýmaqta aıdamaýǵa, las kúıde júrmeýge, qandaı da bir júk artqan sátte zańǵa sáıkes qaýipsizdik sharalaryn saqtaýǵa shaqyrady.
