Jaýapty vedomstvonyń ókili aıtqandaı, sýdaǵy qaýipsizdikti qamtamasyz etý máseleleri respýblıkalyq deńgeıde tótenshe jaǵdaılardyń aldyn alý jáne joıý jónindegi vedomstvoaralyq memlekettik komıssııanyń otyrysynda, sondaı-aq tótenshe jaǵdaılar jónindegi oblystyq, qalalyq jáne aýdandyq komıssııalarda qaralyp, naqty mindetteri men sharalary aıqyndalǵan.
«Halyq eń kóp júretin 125 sý aıdynynda Tótenshe jaǵdaılar mınıstrliginiń 493 qutqarýshysy táýliktik kezekshilikti atqaryp jatyr. Bıyl sý aıdyndarynda baqylaýdy kúsheıtý men azamattardyń qaýipsizdigin qamtamasyz etý úshin shomylý maýsymy bastalysymen sý qoımalarynyń qaýipti jáne kúzetilmeıtin bólikterinde mınıstrliktiń qosymsha 55 jyljymaly qutqarý beketi jumys istep tur. Budan basqa ákimdiktermen jáne sý mańyndaǵy demalys oryndarynyń ıelerimen, mınıstrliktiń jedel-qutqarý jasaqtarynda daıarlyqtan ótken qoǵamdyq qutqarýshylar esebinen 377 nysandyq qutqarý beketi jabdyqtalǵan. Zardap shekkenderge alǵashqy medısınalyq kómek kórsetý úshin kommýnaldyq jáne jeke jaǵajaılarda 162 medısınalyq pýnkttiń qyzmeti jolǵa qoıyldy», dedi B.Syzdyqov.
Kommýnaldyq jaǵajaılarda balalar úshin qaýipsiz arnaıy oryndar qarastyrylypty. Onyń sany – 148. Munda qutqarýshylar balalarǵa júzý daǵdylaryn úıretedi.
«Respýblıkanyń aýmaǵynda 271 ornyqty (stasıonarly) jáne 161 tirekti-modýldi basseın bar. Qazir sý kózderiniń mańynda 64 balalar lageri jumys istep jatyr. Jyl basynan beri atalǵan basseınderde 50 myńǵa jýyq bala júzý daǵdylaryn úırendi», dedi Azamattyq qorǵanys jáne áskerı bólimder komıtetiniń tóraǵasy.
Buǵan qosa 2GIS qosymshasynda, Almaty oblysyn qospaǵanda shomylýǵa tyıym salynǵan (4 458) jáne ruqsat etilgen (486) oryndar týraly málimetter qamtylypty.
Shomylý maýsymy bastalǵaly jaýapty organ Ishki ister mınıstrligi, ákimdikter jáne eriktilermen birlesip 9 myńnan astam patrýldi baqylaý men reıd júrgizip, buǵan 25 myńǵa jýyq adam jumyldyryldy. Zańdy buzǵan 537 azamat ákimshilik jaýapqa tartyldy.
Arnaıy jumystardyń nátıjesinde bıyl elimizdiń sý qoımalarynda 50 adam qutqaryldy. Onyń ishinde 10 bala bar. Bul oraıda oqıǵa kýágerleriniń kómegi septeskenin aıta ketken oryndy.
«Alaıda qaıǵyly oqıǵalar da bar. О́kinishke qaraı, sýdaǵy qarapaıym qaýipsizdik erejelerin saqtamaý saldarynan adamdar qaza bolyp jatqan jaǵdaılar tirkelip jatyr. Atap aıtqanda, 81 adam qaza tapty, onyń ishinde 32-si – bala. Byltyr 125 adam sýǵa ketse, onyń 64-i bala bolǵan. Adamdardyń qaza bolýy 35%-ǵa, balalardyń qaza bolýy 2 ese azaıdy. Shomylý maýsymy bastalysymen 36 adam sýǵa ketse, onyń ishinde 19-y – bala», dedi Tótenshe jaǵdaılar mınıstrliginiń ókili.
Qaıǵyly faktiniń negizgi sebepteri retinde jabdyqtalmaǵan jerlerde shomylý men balalardy qaraýsyz qaldyrýy aıtylyp otyr. Mınıstrlik ókilderi sýdaǵy qaýipsizdikti buzǵan azamattar Ákimshilik kodekske sáıkes jaýapqa tartylatynyn jetkizdi.
«Azamattarǵa aıyppul salynatynyn eskertkimiz keledi. Eshqandaı da eskertý jasalmaıdy, birden 7 AEK mólsherinde aıyppul salynady – 21 myń teńgeden joǵary. Polısııa 364-shi jáne 440-baptarǵa sáıkes jeke jáne zańdy tulǵalardy jaýapqa tartatynyn aıta ketý kerek. Osyndaı 530-dan astam quqyq buzýshylyq tirkeldi. О́ńirlerde máslıhattar bekitken ortaq sý paıdalaný erejelerin buzǵan azamattarǵa aıyppul salynady», dedi B.Syzdyqov.
Birinshi jaǵdaıda ustalǵan tulǵa eskertýmen qutylǵanymen jyl ishinde zań buzýshylyqty qaıtalasa – 2 AEK kólemindegi aıyppuldy tóleýge týra keledi. Quzyrly organ mamandary sý aıdynynda mas kúıinde júrgenderge 5 AEK kóleminde aıyppul salý qarastyrylǵanyn jetkizdi. Sýda júretin jyljymaly tehnıkaǵa qorǵanys kúrteshesiz otyrý, sondaı-aq júzý quralynyń tehnıkalyq aqaýlyǵy úshin de osy kólemde aıyppul salynady.
