Qaraqııa aýdanyna qarasty Qulandy aýylynda turatyn Danııal Tóleýish ulttyq taǵamdardy sapaly daıyndap, kórkem etip qaptap-orap satýǵa shyǵarýmen óz kásibin damytýda. Qatyrǵan seker, irimshik, qurt, balqaımaq, irimshik rafaello jáne taǵy da basqa sút ónimderi bar ulttyq brendtegi táttiler ádemi qaptamamen oblys ortalyǵyndaǵy dúken sórelerinde jáne Aqtaý halyqaralyq áýejaıy kafeterııinde satylymǵa shyqty.
Bir jyl buryn túıe jáne sıyr sútinen taza tabıǵı ónim daıarlap, otbasylyq shaǵyn bıznespen aınalysa bastaǵan Danııal Tóleýish arnaıy saýyn apparattaryn alyp kásibin ulǵaıtqan. Otbasy múshelerinen bólek marketıngpen, ónimdi satýmen, jarnamalyq kontentpen aınalysatyn mamandar alyp, tórt adamdy jumyspen qamtyp otyr.
Qazirgi tańda qulandylyq jas kásipkerdiń Aq dám tabıǵı taza sút ónimderine suranys joǵary eken.
Mal sútinen daıyndalǵan ulttyq taǵamdardyń densaýlyqqa paıdasy qashanda zor. Sondyqtan ol turǵyndar úshin de, týrıster úshin de suranysqa ıe ónim bolmaq.
Mańǵystaý oblysy
