Úlestik qurylys problemalary qalaı sheshiledi?

Almaty qalasyndaǵy Medeý aýdanynda – 7, Al­ma­lyda – 6, Bostandyq pen Ala­taýda – 3, Áýezovte – 2, Jeti­sý, Naýryzbaı, Túrksib aýdan­darynda 1 qurylys nysany áli aıaqtalmaı tur. Qurylysqa kedergi keltirgen faktorlar ishinde qarjy jetispeýshiligi men sot prosesi jıi aıtylady.

«Bıyl bes aıdyń qor­ytyn­dysy bo­ıynsha Qazaq­stan­da sapasyz qurylys salasynda – 2, saraptamalyq nemese ınjınırıngtik jumystardy tıisinshe oryndamaý salasynda – 2, sáýlet, qala quryly­sy jáne qurylys qyzmeti normatıvteriniń erejelerin nemese talaptaryn buzý salasynda 4 qylmystyq quqyq buzýshylyq tirkeldi. Sondaı-aq taý-ken nemese qurylys jumystaryn júrgizý kezinde qaýipsizdik erejelerin buzý salasynda 71 jaǵdaı tirkeldi. Sońǵy bap boıynsha buzýshylyqtar sany jylyna 7 eseden astam ósti», deıdi Ranking sarapshylary.

Indýstrııa jáne ınfra­qurylymdyq damý mınıstri Qaıyrbek О́skenbaevtyń aıtýynsha, 2022 jyldyń birinshi toqsanynda qurylys nysandarynda jalpy somasy 169 mln teńgeni quraıtyn 615 ákimshilik quqyq buzýshylyq esepke alynypty. Profıldi komıtet 32 tekseris júrgizip, 26 uıǵarym jasalǵan. 18 laýazymdy tulǵa ákimshilik jaýapkershilikke tartylypty.

«Jalpy alǵanda úlestik qurylys problemalary sheshi­lip jatyr. Mysaly, «Qazaq­stan Turǵyn úı kompanııasy» AQ «Kazreestr» biryńǵaı aqparattyq júıesin damytý jumystaryn júrgizýde. «Kazreestr» – turǵyn úı qurylysyndaǵy úlestik qatysý kelisimsharttaryn tirkeıtin aqparattyq júıe. Atalǵan júıe kelisimsharttardy tirkeý tý­raly anyqtama berýge kete­tin ýaqytty únemdeıdi. «Kaz­rees­tr­di» damytý aıasynda bıyl kelisimsharttardy tir­keý ýaqytyn taǵy birneshe saǵat­qa qysqartý josparlanyp otyr. Sondaı-aq qury­lys kom­panııalarynyń jeke kabınetin qurý da mańyzdy qadam sanalady», dep jazady Ranking.

Úlestik turǵyn úı qury­lysy naryǵyn jetildirý jáne úleskerler qarajatynyń saqtalýyn qamtamasyz etý maqsatynda qosymsha sharalar qabyldaý boıynsha mynadaı usynystar berilip otyr.

Birinshiden, «Turǵyn úı qurylysynda úlestik qatysý týraly» Zańyn buzǵany úshin jazany kúsheıtý. Úles­kerden aqshany zańsyz jolmen alyp, qarajatty maqsatsyz paıdalanǵany úshin jaýapty tulǵalardy qylmystyq jaýapkershilikke tartý. Ekin­shiden, «Qazaqstan Tur­ǵyn úı kom­panııasy» AQ kepil­digin alý arqyly úles­tik qury­lys júr­gizip jat­qan qury­lys salý­shy­ny reı­tıng­tik baǵa­laý jú­ıe­sin engizý qa­rasty­ry­lyp otyr. Atalǵan mehanızm bo­ıyn­sha, qarjylyq or­nyq­ty kom­­p­a­nııalar úshin ádet­tegi kepil­den­dirý meha­nızmi saqta­la­dy, al reı­tın­gi tómen kom­pa­nııa­lar­ǵa ha­lyq qarjy­sy ýáki­letti mem­le­kettik organ arqyly beriledi.

Qaı kezde de, jaýapker­shilikti kúsheıtýge sep bolatyn faktor – qatal talap pen qatań jaza. Jaýapkershilikten jaltarǵan qurylys kompanııa­sy sonda ǵana yǵady. Úlestik qurylys salasyn ashyq etýge baǵyttalǵan sharalar jemisin beredi, úleskerler problemasy sheshiledi dep úmittenemiz.