Bıyl eldegi eńseli oqý ordasy – ál-Farabı atyndaǵy Qazaq ulttyq ýnıversıteti 80-shi kóktemin Naýryz toıymen qarsy aldy.
Mereıli kóktem merekesi QazUÝ rektory Ǵalymqaıyr Mutanovtyń, arnaıy quttyqtap kelgen sheteldik qonaqtardyń jáne aqsaqaldardyń sózinen soń, «Taza kampýs» baıqaýynyń jeńimpazdaryn marapattaý rásiminiń jáne ekinshi «Amanat» kitabynyń tusaýkeserine ulasty.
Stýdentter qalashyǵynda ótken Naýryz bıyl bar sán-saltanatymen este qalatyn bolady. Bir demmen jurtty jalyqtyrmaı óte shyqqan meıramda barshany «Naýryz-dýman» mýzykalyq-teatrlandyrylǵan kórinisi kútip turdy. Onda eski qala turǵyndary jasy men qarııasy Naýryzdy qarsy alyp, merekelep jatty. Olar asa zor qýanyshpen «Dostyq bıin» bılep, qyzdar men jigitter án aıtysqa túsip, túrli aspaptarda oınap, mereke kórkin qyzdyra tústi. Qazaq halqynyń ulttyq «Kelin túsirý», «Betashar», «Otqa maı quıý», «Toıbastar», «Bata berý» salt-dástúrleri de ótkizildi. Jalpyǵa ortaq meıramnyń sońy «Qara jorǵa» bıine ulasty.
Naǵyz qazaqy dástúr saqtalǵan sharada kózdiń jaýyn alatyn, ásem 20 kıiz úı tigilip, merekeniń meıirin sezingen jurt naýryz kóje, baýyrsaq, ulttyq taǵamnan dám tatyp, ásem ánder men myń burala bılegen bıshilerdiń bıin, sazdy ánderin tyńdap, tańdanyp, ulttyq meıramdy ulttyq ýnıversıtette qarsy alǵandaryna qýanysh bildirdi. Osy oraıda qazaq qolóner jáne zergerlik buıymdarynan kórme uıymdastyrylyp, batyl jáne myqtylary ulttyq sport oıyndary boıynsha sporttyq jarystarda saıysty.
Naýryz toıyna QazUÝ-diń 10 myńdaı oqytýshylary men stýdentteri, shetel dıplomatııalyq korpýsy ókilderi, Almatyda tirkelgen halyqaralyq uıymdar men dıplomatııalyq mıssııalar basshylary jáne Almaty qalasy ákimdiginiń ókilderi, BAQ basshylary, QazUÝ ardagerler men aqsaqaldar keńesi, stýdenttik qoǵamdyq uıymdardyń músheleri de qatysty.
Aınash ESALI,
«Egemen Qazaqstan».
ALMATY.
