Medısına • 30 Maýsym, 2022

AITV ınfeksııasyn anyqtady

13 ret kórsetildi

«Olımp» klınıkalyq-dıagnostıkalyq zerthanasy adamnyń ımmýn tapshylyǵy vırýsyn (AITV) anyqtaýǵa baǵyttalǵan zertteýdi eki jyldan beri júrgizip keledi.

– Osy ýaqyt aralyǵynda zerthanada AITV ınfeksııasyna 105 myń adam tekserildi. AITV 225 pa­sıentten anyqtaldy, onyń ishin­de 130 adamnan ınfeksııa alǵash ret tabylǵan, – dep habarlady «KDL OLIMP» JShS bas dırektory Erlan Súleımenov.

Zerthana basshysy ınfeksııa­nyń alǵash ret anyqtalýy jaıynda naqtyraq aıtty.

– AITV ınfeksııasyn anyq­taǵanda biz oń synamalardy JITS ortalyqtaryna (juqtyrylǵan ımmýn tapshylyǵy sındromynyń aldyn alý jáne oǵan qarsy kúres ortalyqtary) nátıjelerin rastaý úshin jiberemiz. Keıde birshama pasıentke buǵan deıin AITV dıagnozy qoıylǵany, ol adamdar týraly málimet JITS orta­lyqtarynda bar ekendigi anyq­talady. Biraq AITV ınfeksııasy anyqtalǵan pasıentterdiń jartysynan kóbi osy ýaqytqa deıin ózderinde juqpa baryn bilmegen, olarǵa bul dıagnoz alǵash ret qoıylyp otyr. Iаǵnı bul jaǵdaı jekemenshik zerthanalarda AITV-ge tekserilýdiń qoljetimdiligi ınfeksııany anyqtaý kórsetkishin arttyratynyn dáleldep otyr, – dep atap ótti E.Súleımenov.

Zerthana jetekshisi AITV-ǵa qaralý neǵurlym ońaı bolsa, so­ǵur­lym kóp adam óziniń AITV-már­tebesin anyqtaı alady dep sa­naıdy. Al bul óz kezeginde juq­pany erte kezeńde, pasıent óz már­tebesin bilmeı ınfeksııany kóp adamǵa juqtyryp úlgermegen kezde anyqtap, vırýsqa qarsy emdi ýaqtyly bastaý múmkindigin arttyrady.

– Jalpy qan taldaýyn tapsyrý qanshalyqty ońaı bolsa, AITV-ǵa qaralý da sondaı jeńil bolýy qajet. Sebebi adamdardyń barlyǵy AITV-ǵa tekserilý úshin JITS ortalyqtary men turǵy­lyqty jerleri boıynsha bekitilgen emhanalarǵa arnaıy barýǵa daıyn dep aıta almaımyz. Jekemenshik zerthanalar kerisinshe jer-jerde ornalasqan, sol arqyly adamdar ózine qolaıly jerde AITV-ǵa taldaý tapsyra alady. Bul juqpanyń bolýy yqtı­mal adamdardyń ne­ǵur­lym kóp sanyn tekserýmen qamtýǵa yqpal etedi, – deıdi E.Súleımenov.

Infeksııanyń negizgi taralý joly – qorǵalmaǵan jynystyq qatynastar. Sondaı-aq AITV-ny sterıldi emes quraldar arqyly medısınalyq, kosmetologııalyq jáne ózge manıpýlıasııalar kezinde de juqtyrý múmkin.

Taldaý úshin kóktamyr qany qoldanylady.

AITV ınfeksııasynyń mar­kerleri qanda juqtyrýdan keıin birneshe apta ótken soń ǵana biline bastaıdy. Sondyqtan AITV-ny anyqtaýǵa baǵyttalǵan taldaýdy yqtımal juqtyrýdan keıin kem degende bir aı ótken soń tapsyrý usynylady.

Sońǵy jańalyqtar

Búgin 3 qalada aýa sapasy nasharlaıdy

Aýa raıy • Búgin, 09:38

Uqsas jańalyqtar