Qazaqstan • 30 Maýsym, 2022

Prezıdent AES salarda Túrkııanyń tájirıbesin zerdeleýdi tapsyrdy

23 ret kórsetildi

Reformalar jónindegi joǵary keńestiń otyrysynda elimizde qaýipsiz atom jáne sýtegi energetıkasyn damytý sharalaryna basa mán berildi, dep habarlaıdy Egemen.kz.

Bul baǵyttaǵy jumys týraly Energetıka mınıstri Bolat Aqsholaqov pen «Samuryq-Qazyna» aksıonerlik qoǵamynyń tóraǵasy Almasadam Sátqalıev baıandama jasady.

Prezıdent MAGATE derekterin mysalǵa keltirdi.

Buǵan sáıkes álemdegi qýat kózderiniń 10 paıyzy atam energetıkasynyń úlesinde ekeni aıtyldy.

Atalǵan sektor kómir (36,7%), gaz (23,5 %) jáne gıdroenergetıka (16 %) salalarynan keıin tórtinshi orynda tur.

«Atom energetıkasy kómirtektiń jyldyq qaldyqtaryn shamamen 2 mıllıard tonnaǵa azaıta otyryp, tómen kómirtekti elektr qýatynyń jalpy kóleminiń úshten birinen astamyn óndiredi. Bul 400 mıllıon avtokóliktiń qaldyǵyna teń. Al atom energetıkasynyń bolashaǵyna keletin bolsaq, túrli faktorlarǵa baılanysty belgisizdik deńgeıi óte joǵary. Alaıda, qazirgi tańdaǵy energııa daǵdarysy men energııa resýrstary baǵasynyń qubylmaly jaǵdaıynda «beıbit atomdy» paıdalaný máselesi kóptegen úkimetterdiń kún tártibine engizilgeni anyq. Geosaıası jaǵdaıdyń shıelenisýine baılanysty Halyqaralyq energetıka agenttigi Eýropa odaǵy elderin barlyq atom elektr stansııalaryn jabý máselesin keıinge shegerýge shaqyrdy», dedi Prezıdent.

Qasym-Jomart Toqaev qazirgi tańda álemniń 32 elinde 440-tan astam ıadrolyq reaktor bar ekenin jáne 20-ǵa jýyq memleket óz aýmaǵynda atom elektr stansııasyn salý múmkindigin qarastyryp otyrǵanyn atap ótti.

Olardyń qatarynda bizdiń elimizden bólek, Chılı, Indonezııa, Aljır, Fılıppın, Efıopııa, Senegal jáne basqa da memleketter bar.

Sonymen qatar Prezıdenttiń aıtýynsha, tehnologııalardy jetkizýshilerdiń short-paraǵyn aıqyndaý mańyzdy jáne onda baǵa ólshemderinen bólek tehnologııalardyń senimdiligine basa mán berilýge tıis.

Qasym-Jomart Toqaev bilim alýdyń jáne óndiristik quzyretke qol jetkizýdiń asa mańyzdy ekenin aıtty.

«Basqasha aıtqanda, biz bolashaqta bilikti fızıkterdi, atom salasyndaǵy kadrlardy, ınjenerler men tehnıkalyq mamandardy daıyndaýymyz kerek. Múldem jańa oqý-óndiristik baza qurý qajet», dedi Memleket basshysy.

Prezıdent Túrkııanyń «Akkýıý» AES-in salýdaǵy tájirıbesin jan-jaqty zerdeleýdi tapsyrdy.

Sońǵy jańalyqtar

Uqsas jańalyqtar