Qoǵam • 01 Shilde, 2022

Jaldamaly jumysshylardyń jalaqysy 17 paıyzǵa ósti

36 ret kórsetildi

Ulttyq statıstıka bıýrosynyń málimetinshe, kásipkerlik qyzmetpen aınalysatyn shaǵyn kásiporyndardy esepke alǵanda bir qyzmetkerdiń ortasha aılyq ataýly jalaqysy 231 476 teńgeni qurady, dep habarlaıdy Egemen.kz.

Jalaqy mólsheri ótken jylmen salystyrǵanda 17,7%-ǵa ósti, naqty mánde ósim 9%-dy qurady.

«Kásipkerlik qyzmetpen aınalysatyn shaǵyn kásiporyndardy eskere otyryp, ortasha aılyq jalaqynyń eń kóp ósýi ótken jylmen salystyrǵanda densaýlyq saqtaý jáne halyqqa áleýmettik qyzmet kórsetý salasynda – 29,7%-ǵa, bilim berý salasynda – 24,1%-ǵa, qarjy jáne saqtandyrý qyzmetinde - 21,1%-ǵa, ózge de qyzmet túrlerin usyný salasynda - 21,2%-ǵa baıqaldy», delingen Ulttyq statıstıka bıýrosynyń habarlamasynda.

Salalar arasynda eń joǵary ataýly jalaqy taý-ken óndirý ónerkásibinde jáne karerlerdi qazýda – 477,1 myń teńge (ortasha respýblıkalyq deńgeıden 2,1 ese joǵary), qarjy jáne saqtandyrý qyzmetinde – 437,1 myń teńge (1,9 ese), aqparat jáne baılanys salasynda - 330,1 myń teńge (1,4 ese), kásiptik bilim berý salasynda - 477,1 myń teńge (ortasha respýblıkalyq deńgeıden 2,1 ese joǵary), ǵylymı jáne tehnıkalyq qyzmetke – 305,8 myń teńge (tıisinshe 1,3 ese).

Kásipkerlik qyzmetpen aınalysatyn shaǵyn kásiporyndardy esepke alǵanda, ortasha aılyq ataýly jalaqynyń tómen deńgeıi aýyl, orman jáne balyq sharýashylyǵy salalarynda – 135 430 teńge, sondaı-aq óner, oıyn-saýyq jáne demalys salalarynda - 155 524 teńge belgilengen.

О́ńirler arasynda shaǵyn kásiporyndardy esepke alǵanda eń joǵary ortasha aılyq ataýly jalaqy Atyraý oblysynda belgilendi – 379 901 teńge.

Bul rette Shymkentte onyń shamasy 170 397 teńgeni qurady, bul el boıynsha ortasha deńgeıden 26,4%-ǵa tómen.

Sońǵy jańalyqtar

Uqsas jańalyqtar