Álem • 02 Shilde, 2022

Ýkraınanyń 16 mln azamaty gýmanıtarlyq kómekke muqtaj

27 ret kórsetildi

Búgin Kıevtegi baspasóz máslıhatynda BUU Ýkraınadaǵy gýmanıtarlyq máseleler jónindegi úılestirýshisi Osnat Lýbranı Ýkraınanyń 16 mln azamaty gýmanıtarlyq kómekke muqtaj ekenin málimdedi, dep habarlaıdy Egemen.kz  BUU jańalyqtar qyzmetine silteme jasap.

BUU Gýmanıtarlyq mekemeler júıesi seriktes uıymdarmen jáne ýkraınalyq eriktilermen birigip turǵyndarǵa kómek kórsetý úshin jumys isteýde.

«Sońǵy tórt aıda Ýkraına búkil álemniń nazarynda boldy. Bul árıne jaqsy jaǵynan emes. Reseıdiń Ýkraınaǵa qarsy soǵysy bastalǵaly bul eldegi ár áıeldiń, ár erkektiń jáne ár balanyń ómiri qurtyldy: olardyń jaqyndary óltirildi, jaraqat aldy, otbasynan aıyryldy, myńdaǵan úıge bomba tastaldy. Bul azapty sózben aıtyp jetkizý múmkin emes», dedi Osnat Lýbranı óziniń málimdemesinde.

Ol búginde 16 mln ýkraınalyqtyń sýǵa, tamaqqa, medısınalyq kómekke jáne baspanaǵa muqtaj ekenin aıtty.

«Bul tek yqtımal boljam. Qazir BUU seriktesterimizben birge qaıta qarap jatyr. Alty mıllıonnan astam adam ishki kóship-qonyp júrgender qatarynda. Bes mıllıonǵa jýyq adam týǵan jerine qaıta oraldy, biraq olar qaıta ketýge májbúr bolatyndaryn túsinip otyr. 5,3 mln ýkraınalyq basqa elderge bosqyn bolyp ketti», dep qosty BUU úılestirýshisi.

Sońǵy jańalyqtar

Uqsas jańalyqtar