Keńeske ortalyq memlekettik organdar men Nur-Sultan, Almaty, Shymkent qalalarynyń jáne oblystardyń ákimdikteri qatysty.
Jıynda halyqty tolǵandyratyn máseleler talqylandy, olardy memlekettik organdar men ákimdikter aldyn ala boljap, olardy sheshý úshin naqty algorıtm ázirleýi qajet ekeni aıtyldy.
«Ýaqytynda sheshilmegen másele halyqtyń narazylyǵyn týdyrýy múmkin. Sondyqtan memlekettik organdar táýekelderdi únemi taldap, olardy sheshýge árdaıym daıyn bolýǵa tıis», dedi Eraly Toǵjanov.
Keńes aıasynda memlekettik organdardyń jalaqysy, kommýnaldyq tarıfter, áleýmettik mańyzy bar taýarlar men ónimderdiń baǵasyn retteý, elektr energııasyn óndirý, kómir jetkizý, JJM-men qamtamasyz etý, qoqys polıgondary sekildi máselelerdi sheshý jónindegi esepteri tyńdaldy.
Keńes barysynda Bilim jáne ǵylym mınıstrligine jáne ákimdikterge pedagogterge jalaqyny ýaqytyly tóleýdi qamtamasyz etý, aýyl sharýashylyǵy mınıstrligine áleýmettik mańyzy bar azyq-túlik ónimderi baǵasynyń negizsiz ósýine jol bermeý úshin óndiris pen tutyný teńgeriminiń naqty boljamyn ázirleý tapsyryldy.
Toǵjanov atap ótkendeı, balalardy oqý jylyna daıyndaý maýsymy alda tur, bul da halyq shyǵyndarynyń artýymen qatar júrýi múmkin. Sondyqtan baǵany turaqtandyrý úshin qoldanystaǵy naryqtyq quraldardyń múmkindikterin barynsha paıdalaný qajet.
Keńes qorytyndysy boıynsha barlyq memlekettik organdar men óńirler ákimdikteriniń aldyna kelesi mindetter qoıyldy:
Jalaqy boıynsha bereshektiń paıda bolýyna jol bermeý;
Barlyq yqtımal táýekelderdi turaqty negizde taldaý jáne salanyń problemalyq máselelerin sheshý boıynsha qadamdyq is-qımyldar algorıtmin ázirleý;
Problemalyq máseleler bolǵan jaǵdaıda olardyń sheshimin erekshe baqylaýǵa alý;
Memlekettik organdardyń aqparattyq, túsindirý jumystaryn kúsheıtý, áleýmettik jelilerdegi alańdardy belsendi túrde jyljytý, sondaı-aq halyqtyń suraqtaryna turaqty túrde jaýap berý.
