Qazaqstan • 05 Shilde, 2022

Qazaqstanda turǵyn úı saıasaty reformalanady

33 ret kórsetildi

QR Indýstrııa jáne ınfraqurylymdyq damý mınıstri Qaıyrbek О́skenbaev Úkimet otyrysynda «Otbasy bankin» reformalaý josparlary jáne qazaqstandyqtardy turǵyn úımen qamtamasyz etýdiń jańa qaǵıdattary týraly aıtty, dep habarlaıdy Egemen.kz.

«Búginde memleket basshysynyń tapsyrmasymen turǵyn úı saıasatyn reformalaý máseleleri boıynsha QR Zańynyń jobasy ázirlendi, ol QR Parlamenti Májilisiniń qaraýynda jatyr. Zań jobasy sheńberinde turǵyn úı saıasatyn tutastaı reformalaý jáne ony ekinshi deńgeıdegi bankter júıesinen shyǵara otyryp, «Otbasy bankin» ulttyq damý ınstıtýty etip qaıta qurý usynylady. Sondaı-aq «Otbasy banki» bazasynda «Turǵyn úımen qamtamasyz etý ortalyǵyn» qurý josparlanýda, ol sanattarǵa tıesiligine qaramastan, respýblıka aýmaǵynda turǵyn úıi joq azamattardy esepke alýdy júzege asyrady», dedi Qaıyrbek О́skenbaev.

Onyń aıtýynsha, usynylyp otyrǵan jańa modelde turǵyn úı jaǵdaılaryn jaqsartý boıynsha memlekettik qoldaý sharalary esepke qoıý kúnine, tabystyń bolýyna jáne berilgen ótinimge baılanysty júzege asyrylady.

«Tutastaı alǵanda, bul jańashyldyqtar halyqty turǵyn úımen qamtamasyz etýdiń tıimdiligin arttyrýǵa, azamattardyń turǵyn úı alý rásimin ońtaılandyrýǵa, sondaı-aq azamattardyń barlyq sanattary arasynda turǵyn úıdi ádil bólýdiń biryńǵaı tetigin engizýge múmkindik beredi», dedi mınıstr. 

QR IIDM málimetteri boıynsha, qazirgi ýaqytta zań jobasyn talqylaý boıynsha jumys tobynyń 8 otyrysy ótti, onyń sheńberinde 258 túzetý usynylyp, 155-i qabyldandy.

Vedomstvo basshysy atap ótkendeı, búginde ákimdikterde 613 myń azamat kezekte tur, onyń ishinde 222 myń adam - áleýmettik osal sanattaǵy kezekte. Sondaı-aq tabysy eń tómengi kúnkóris deńgeıinen tómen 70 myń adam - kóp balaly otbasylar, jetim balalar, 1 jáne 2-toptaǵy múgedek adamdar jáne múgedek balalary bar otbasylar da bar.

Ol Memleket basshysynyń tapsyrmasy boıynsha jeke turǵyn úı qorynda turǵyn úıdi jalǵa alǵany úshin turǵyn úı tólemderiniń tetigi ázirlengenin, tıisti qaǵıdalar men «Otbasy banki» bazasynda sıfrlyq platforma ázirlengenin eske saldy.

«Búginde 25 myńnan astam ótinim qabyldanyp, olardyń 6 myńǵa jýyǵy maquldandy. Respýblıkalyq bıýdjette 40 mlrd teńge kóleminde qajetti qarjylandyrý kólemi qarastyrylǵan jáne búgingi kúni «Otbasy bankke» qarjylandyrý josparyna sáıkes 3 mlrd teńge aýdaryldy. О́ńirlerdegi máslıhattar qajetti 10 mlrd teńgeniń 3,7 mlrd teńgesine jergilikti bıýdjet shyǵyndaryn bekitti. Sonymen qatar Batys qazaqstan oblysy boıynsha osy kúnge deıin jetkizilgen lımıtke sáıkes turǵyn úı tólemderi úshin jergilikti bıýdjetten qarjylandyrý qarastyrylmaǵan», dedi Qaıyrbek О́skenbaev.

Sońǵy jańalyqtar

Uqsas jańalyqtar