Jıynda Amanat partııasynyń hatshysy Dáýlet Káribek: «Memleket basshysy jerdi ózi de paıdalanbaıtyn, ózgege de bermeıtin jer ıelenýshiler bar ekenin birneshe ret aıtqan bolatyn. Osy máselede ádildikti qalpyna keltirý – komıssııanyń basty mindeti. Bul baǵytta atqarylǵan jumys nátıjesi boıynsha Aqtóbe oblysynda memleket menshigine 20 myń gektar jer qaıtaryldy. Jumys jalǵasyn tabady», dedi.
Atap aıtqanda, Baıǵanın aýdanynda – 15 myń ga, Hromtaý aýdanynda – 1,9 myń ga, Qobda aýdanynda – 2,1 myń ga, Áıteke bı aýdanynda – 149 ga, Qarǵaly aýdanynda – 876 ga, Aqtóbe qalasynda 370 ga jaıylym memleket menshigine qaıtaryldy.
Oblystyq aýyl sharýashylyǵy basqarmasynyń málimetine sáıkes, óńirdegi barlyq jaıylymnyń jalpy kólemi 25 mln gektarǵa jetedi. Olardyń kópshiligi shalǵaı aýdandarda ornalasqan, al jer ýchaskeleri negizinen eldi mekenderdiń aınalasynda tapshy.
«Oblystyń jeke qosalqy sharýashylyqtarda 314,8 myń bas mal tirkelgen. Olardy jaıý úshin shamamen 105 myń gektar jetispeıdi. Bul másele, ásirese, Alǵa, Mártók, Temir aýdandarynda jáne Aqtóbe qalasynda ózekti. Qazirdiń ózinde jerdi jón-josyqsyz paıdalanǵandardyń tizimi 244-ke jetti. Materıaldar quzyretti organdarǵa joldandy», dep málimdedi basqarma basshysy Isataı Espaǵanbetov.
Eske sala keteıik, partııa janynan qurylǵan «Jer amanaty» komıssııasynyń muryndyq bolýymen sońǵy birneshe aı ishinde Qaraǵandy, Jambyl jáne Túrkistan oblystaryndaǵy 140 myń gektardan astam jaıylymdyq jer memleket menshigine qaıtaryldy.
