«Bul sheshim osy jyldyń mamyr-maýsym aılarynda júrgizilgen boljamdyq raýndtyń qorytyndysy negizinde qabyldandy. Biz ınflıasııa ósip, jyl sońyna qaraı 13-15% deńgeıinde qalyptasady dep boljap otyrmyz.
2022 jylǵy naýryzdan bastap geosaıası jaǵdaıdyń shıelenisýi jáne Qazaqstannyń qarjy naryǵyna qysymnyń aıtarlyqtaı kúsheıýiniń aıasynda Qazaqstanda ınflıasııa údeı túskenin eskergen jón. Reseı Federasııasyna qarsy sanksııalarǵa baılanysty jahandyq jetkizilim tizbegindegi problemalardyń shıelenisýi álemdegi óndiris qunynyń qymbattaýyna alyp keldi. Sheshim qabyldaǵanda biz osy faktorlardyń barlyǵyn eskeremiz», dedi ol Ulttyq bank saıtynda jarııalanǵan suhbatta.
Onyń aıtýynsha, bazalyq mólsherlemeniń saqtalýy ınflıasııany báseńdetýge septigin tıgizbek.
«Orta merzimdi kezeńde ınflıasııany báseńdetý maqsatymen ınflıasııamen kúrestiń jáne ekonomıkanyń ósýi arasyndaǵy teńgerimdi eskere otyryp, biz bazalyq mólsherlemeni 14% deńgeıinde saqtap qaldyq.
Bazalyq mólsherlemeniń joǵary bolýy kontrsıkldik bıýdjet saıasatymen jáne syrtqy ınflıasııalyq qysymnyń álsireýimen birge 2023 jyly ınflıasııanyń 7,5-9,5%-ǵa deıin baıaýlaýyna yqpal etedi», dedi Ulttyq bank tóraǵasy.
