Jastar forýmynyń úshinshi kúni Premer-Mınıstrdiń orynbasary Eraly Toǵjanov, partııanyń Saıası bıýrosynyń múshesi Darhan Qydyráli, «Ádildik joly» qoǵamdyq birlestiginiń atqarýshy dırektory Dıdar Smaǵulov «Jas Talks» ashyq dıalog alańynda elimizdiń túkpir-túkpirinen kelgen jastarmen kezdesti. Beıresmı jaǵdaıda áńgime órbip, jastar qaýymy ózderin tolǵandyrǵan suraqtaryn qoıdy. Tushymdy jaýap aldy.
«Jastar úshin eń bastysy – bilim. Sebebi bilimdi azamat ózin erkin sezinedi, bolashaqqa senimmen qaraıdy jáne qaı baǵytta qozǵalý kerek ekenin biledi. Árbir jas qazaqstandyq osyǵan umtylýy tıis. Árıne, mamandyq tańdaý – bul kúrdeli másele. Sondyqtan bıyl mektepterde jetinshi synyptan bastap oqýshylarǵa kásiptik baǵdar beretin muǵalim jumys isteıtin bolady. Ol oqýshylarǵa durys baǵyt tańdaýǵa kómektesedi», dedi E.Toǵjanov.
Vıse-premer elimizde UBT-nyń talaptary ózgergenin de tilge tıek etti. Budan bylaı abıtýrıentterge bir emes, 3-4 ret test tapsyrýyna bolady. Bul qadam jastar arasynda jıilep ketken sýısıd máselesiniń aldyn alýǵa baǵyttalyp otyr. Sebebi test tapsyrýǵa kelgen azamattar qınalǵan kezde psıhologııalyq, moraldyq turǵyda kúızeliske túsedi. Keıbireýi test nátıjesin kórip qaıǵyǵa beriledi.
«Jas ǵalymdarǵa naqty múmkindikter jasalyp jatyr. Búginde elimizde bas-aıaǵy 34 000 ǵalym bar bolatyn bolsa, sonyń 8 700-i – jas ǵalymdar. Iаǵnı, ǵalymdardyń 24%-y – el jastary. Sol jas ǵalymdarǵa bıyldan bastap bir myń grant beriledi. Aldaǵy ýaqytta bul kórsetkishti 50%-ǵa deıin arttyrýdy josparlap otyrmyz. Aldymyzǵa osyndaı maqsat qoıdyq. Bul – jastarǵa jasalyp jatqan qomaqty qoldaý. Shetelde júrgen qanshama bilimdi azamattarymyz bar. Olardy da elge tartý máselesi qolǵa alynyp jatyr», dedi spıker.
Kún tártibinde turǵan mańyzdy máseleniń biri – jumyssyzdyq. Eraly Toǵjanov búginde elimizde jastar arasyndaǵy jumyssyzdyq deńgeıi 3,4%-dy, al esh jerde jumys istemeıtin jáne oqymaıtyn jastar 7,2%-dy quraıtynyn atap ótti. Sonymen qatar vıse-premer «AMANAT» partııasymen birlesip júzege asyrylyp jatqan «Aýyl amanaty» jobasyna egjeı-tegjeıli toqtaldy.
«Aýyldyń máselesin sheship almaıynsha, qalanyń máselesi sheshilmeıdi. Azyq-túlik qaýipsizdiginen ózge, kóshi-qon máselesi de bar. Aýyl gúldense qalada bilim alǵan jastar týǵan jerine oralady. Memleket qandaı jaǵdaı jasasa da, ár adam túpki sheshimdi jumys isteýge degen jeke qalaýyna qaraı qabyldaıdy. Árkim ózine, jaqynyna, istegen isine jaýapkershilikpen qaraı bastaǵan kezde budan da gúldengen qoǵamda ómir súretin bolamyz», dedi E.Toǵjanov.
