Indýstrııa jáne ınfraqurylymdyq damý mınıstrliginiń málimetinshe, kóptegen kásiporyndarda ónerkásipti modernızasııalaý boıynsha jumystar júrgizilip, jańa jobalar iske qosylýda.
«Máselen, «Altynalmas AK» AQ kompanııasy Jambyl oblysyndaǵy «Aqbaqaı» altyn ken ornynyń óndiristik alańdarynda modernızasııa júzege asyrýda. Osyǵan oraı ken barlaý jumystarynda paıdalanylatyn qural-jabdyqtar jańartylyp, dıirmen qurylysy aıaqtaldy jáne qajetti tehnıkalar satyp alyndy. Sondaı-aq «Sıfrlyq ken orny» jobasyn óndiriske engizý aıasynda SCADA qashyqtan basqarý baǵdarlamasy qoldanylmaq», deıdi IIDM mınıstrligi.
Sonymen qatar Faza-2 altyn alý fabrıkasyn iske qosý da kózdelip otyrǵanyn aıtty. Atalǵan kásiporyn altyn rýdalaryn qaıta óńdeýdi jylyna 1,2 mln tonnaǵa deıin arttyrýǵa múmkindik bermek. Sáıkesinshe, jylyna altyn óndirisi kólemi 13 paıyzǵa artatyn bolady.
«Altynalmas» kompanııasy qorshaǵan ortany qorǵaýǵa da óz úlesin qosýda. Kásiporyn balamaly qýat kózderi arqyly parnıktik gazdar shyǵaryndylaryn azaıtyp, aýaǵa bólinetin kómirqyshqyl gazynyń mólsherin azaıtýda. Kásiporynǵa tıesili Qaraǵandy oblysyndaǵy ken oryndarynda kún sáýlesi arqyly qýat alatyn arnaıy baǵandar ornatyldy. Olar bir birinen jarty shaqyrym qashyqtyqta ornalasqan. Jalpy aýmaǵy 10,85 shaqyrymdy quraıdy», delingen habarlamada.
Al otandyq RG Gold altyn óndirý kompanııasy qýattylyǵy jylyna 5 mln tonna rýda óndirýge qaýqarly jańa taý-ken keshenin ashpaq. Qazirgi tańda qural-jabdyqtardy ornatý jumystary júrgizilýde. Keshen bıyl kúzde paıdalanýǵa beriledi dep josparlanyp otyr. Osy rette aıta keterligi, keshen qurylysynda ekologııalyq normalarǵa basymdyq berilip, halyqaralyq zańnama talaptary saqtalǵan.
Mamandardyń aıtýynsha, Raıgorodok ken ornyndaǵy óndiris qýattylyǵynyń artýy oǵan jaqyn eldi meken turǵyndarynyń ál-aýqatynyń artýyna yqpalyn tıgizetin bolady. Kásiporynǵa qajetti mamandar men jumysshylardy tartýda jergilikti turǵyndarǵa basymdyq beriledi. Kompanııa olardyń kásibı biliktiligin jetildirip, óndiris oshaǵynda ári qaraı jumys isteýge qoldaý kórsetedi.
