«Asar Ume» qaıyrymdylyq qorynyń bastamasymen QR Aqparat jáne qoǵamdyq damý mınıstrligi jáne Nur-Sultan qalasy ákimdiginiń qoldaýymen, qalalyq Jastar saıasaty máseleleri basqarmasynyń uıymdastyrýymen ótken bul aıtýly is-sharanyń ashylý saltanatyna QR Premer-Mınıstriniń orynbasary Eraly Toǵjanov, QR Ǵylym jáne joǵary bilim mınıstri Saıasat Nurbek, Nur-Sultan qalasy ákiminiń orynbasary Eset Baıken jáne elimizdegi birqatar qaıyrymdylyq uıymdarynyń ókilderi qatysty.
QR Prezıdenti janyndaǵy jastar saıasaty jónindegi Keńestiń múshesi, «Asar Ume» qoǵamdyq qorynyń jetekshisi Ashat Nurmashev bastamashylyq etken «Asar Joly» qaıyrymdylyq marafony óskeleń urpaqtyń rýhanı-adamgershilik tárbıesin qalyptastyrýǵa, nyǵaıtýǵa, el halqynyń mádenıeti men dástúrlerin nasıhattaýǵa baǵyttalǵan jastardyń qoǵamdyq paıdaly bastamalaryn qoldaý maqsatynda ótip jatyr.
Bul joba Úkimettiń tikeleı qoldaýymen, Aqparat jáne qoǵamdyq damý mınıstrligi men Nur-Sultan qalasy ákimdiginiń atsalysýymen júzege asyp jatyr jáne aldaǵy ýaqytta elimizdiń jıyrma óńirinde jalǵasyn tabady dep josparlanyp otyr.
«Mundaı jobalardy qoldaý meniń tikeleı mindetim. «Asar joly» jobasyna elimizdegi ákimdikterdiń barlyǵy kómektesedi. О́tkende soǵan baılanysty arnaıy otyrys ótkizdik, ákimdermen kelistim. Bul – kiristerdi kóbeıtý baǵytyndaǵy bir ǵana úlken joba. Osyndaı jobalardy bir jaǵadan bas, bir jeńnen qol shyǵaryp qoldaıyq, dedi Premer-Mınıstrdiń orynbasary Eraly Toǵjanov.
«Asar joly» jobasynyń maqsaty – 20 myń shaqyrym jol júrip, búkil elimizdi aralap, barlyq qalalarymyzǵa soǵyp, ata-babamyzdan qalǵan joldy qýyp, jaqsylyqta jarysyp, muqtajdarǵa pana berip, qol ushyn sozyp, jas balalarǵa, qıynshylyqta júrgen otbasylarǵa motıvasııa berý. El boıynsha elý shaqty otbasyn baspanaly etýdi josparlap otyrmyz. Odan basqa, jumyspen, bilimmen, kásippen kómektesý oıymyzda bar, deıdi «Asar Ume» qaıyrymdylyq qorynyń jetekshisi Ashat Nurmashev.
Aıta ketý kerek, «Asar Ume» – turmystyq jaǵdaıy tómen jáne qıyn jaǵdaıǵa tap bolǵan kóp balaly otbasylarǵa kómek kórsetetý, jastardy jumysqa ornalasýǵa, oqýǵa, bıznespen aınalysýǵa kómektesetin qoǵamdyq qor. Búginde qor jas, eresek eriktiler, kásipkerler, jumysshylar men belsendi azamattardy jaqsylyq jasaýdyń aınalasynda biriktirýde. Qor qurylǵan 3 jyl ishinde Qazaqstan boıynsha úsh mıllıonnan astam adamdy biriktirip, elimizdegi az qamtylǵan 440 otbasynyń baspanaly bolýyna at salysqan.
Atalǵan is-sharada asar dástúri ǵana jańǵyryp qoımaı, sadaq atý, teńge alý, asyq atý sııaqty ulttyq oıyndar da oınatyldy.
