«Keshki altydan soń tamaqtanbaý kerek degendi tek artyq salmaǵy bar kisiler úshin ǵana qoldanýǵa bolady. Al, basqa qyzmettegi, ásirese, aýysymmen keshki 6-da jumysta bolatyn keıbir mamandyq ıelerine tyıym sala almaımyz. Sondaı-aq, kóptegen keńse qyzmetkerleriniń jumys kestesi keshki 6-da aıaqtalatyndyqtan, keshki asty daıyndap tamaqtanamyn degenshe keshki saǵat 8 bolýy múmkin.
Kúni boıyna jumsaǵan energııa shyǵynynyń ornyn keshki aspen tıimdi toltyrý qajet. Keshki astyń jeńil sińimdi, sút, jarma men kókónisterdiń asylǵan, buqtyrylǵan túrlerin tutynǵan durys. Aýyr qorytylatyn maıly, qýyrylǵan taǵamdar bolǵan jaǵdaıda sińimdiligin jyldamdatatyn kókónis salattarymen birge, et taǵamdaryn ashyǵan sút ónimderimen úılestire, zat almasýdy jaqsartatyn kókónis shyryny men kók sháı qoldansa astyń qorytylýy jyldamdaıdy», deıdi Tóregeldi Sharmanov.
Onyń aıtýynsha, búgingi kúni qozǵalysy az, durys tamaqtanbaıtyn jastar, sondaı-aq, jasy ulǵaıǵan adamdar arasynda ishtiń qatýy kóp kezdesedi.
«Ishtiń qatýy ishektegi ashý, bojý úrdisterin buzyp, úlken dárettiń irkilýine, ishektegi irkilgen qaldyq zattar ýytty qasıetke ıe bolyp, aǵzanyń ýyttanýyna ákelýi múmkin. Ol ót joly qabyný aýrýlarynan basqa, birden-bir tamaqtaǵy taǵamdyq talshyǵy mol kókónis taǵamdary, salattar men keıbir jemisterdiń, ashytylǵan sút ónimderiniń az túsýinen, qurǵaq fast-fýd taǵamdaryn jıi qoldanýdan, táýlik boıyna ishiletin suıyqtyq jáne sý mólsheriniń 1,5-2 lıtrden kem túsýinen bolady. Úı jaǵdaıynda kúnine 2-3 ret 50 gramm shıki qyzylsha, sábiz, almany úkkishten ótkizip, ósimdik maıymen salat túrinde ne shyrynyn syǵyp ishýge bolady. Erteńgilik asqa suıyq sulydan jasalǵan sút kójesin, túske kókónis sorpasy ne kójesin qara nanmen, besindik asqa ıogýrt, keshke ósimdik maıy qatylǵan shıki kókónister salatymen býǵa pisirilgen taǵamdar, jatarda 1 kese aıran qoldanylyp otyrsa, ishektiń jıyrylǵyshtyq qyzmeti jaqsarady», deıdi T.Sharmanov.
