Erlikteri eskerýsiz qalmady

Aldymen departament basshysy jýyrda «Ponton kópiri» aýdanynda sýǵa aǵyp kete jazdaǵan bala­nyń janyn saqtap qalǵan Darhan Muha­med­ja­novty arnaıy gramotamen marapattady. Ol balyq aýlap júrgen kezinde ózende tunshyǵyp jatqan balany baıqap, der kezinde kómekke kelgen. Anyqtaı kele jasóspirim aǵyn sýmen qalqyǵan aıaqkıimine qaraı umtylǵan, alaıda ózennen shyǵa almaı qalǵan. Abyroı bolǵanda, onyń qasynan D.Muhamedjanov tabyla bilgen.

Ekinshi oqıǵaǵa kelsek, shildeniń 24-de «Neftebaza» aýdanyndaǵy Ertis ózeniniń oń jaǵalaýynda 1983 jylǵy er adam shomylyp júrip sýǵa bata bastaǵan. Ony jaǵalaýda demalyp jatqan Sergeı Fomınyh, Erjan Jáńgirov jáne Vıktor Glınskıh baıqap, janyna arasha túsken. Zardap shekken azamatty jaǵaǵa shyǵaryp, alǵashqy medısınalyq kómek kór­se­tip bolǵan soń jedel járdem dári­ger­lerine tapsyrǵan.

«Reanımasııalyq árekettiń 4-shi mártesinde er azamat esine kelip, ony jedel járdem dárigerlerine tapsyrdy. Belgili bolǵandaı, zardap shegýshi dosymen birge ózenniń belgilenbegen jerinde shomylyp júrgende esinen tanyp qalǵan», delingen tótenshe jaǵdaılar departamenti taratqan aqparatta.

Belgili bolǵandaı, qala turǵyny Sergeı Fomınyh sýda eshbir qımylsyz qalqyp bara jatqan er adamdy baıqap, sol sátte kómekke umtylady. Oǵan er azamatty ózennen alyp shyǵýǵa Erjan Jáńgirov kómektesken. Olar zardap shekken adamǵa birden alǵashqy medısınalyq kómek kórsete bastaǵan. Qutqarýshylardyń qataryna Vıktor Glınskıı esimdi qala turǵyny da qosylyp, reanımasııalyq áreketter jasaýǵa járdemdesipti.

«Adamdardyń janyn saqtap qal­ǵan­daryńyzǵa myń alǵys. Sizder­diń erlikterińiz tek qurmetke laıyq. Naǵyz batyrsyzdar. Erliktiń, batyl­dyq­tyń, qaısarlyqtyń aıqyn úl­gi­si osyndaı bolsa kerek», dedi A.Shtykel.

Álbette, mundaı azamattardyń qareketi qansha aıtsaq ta maqtaýǵa jarasady. Dese de tótenshe jaǵdaılar qyzmeti shomylý maýsymynda sýdaǵy qaýipsizdik erejelerin meılinshe qatań saqtaý kerektigin eskertedi. Ásirese ishimdik ishken azamattarǵa shomylmaýǵa, balalardy qaraýsyz qaldyrmaýǵa, jalǵyz sýda júzbeýge, beıtanys jerlerde shomylýdan aýlaq bolýǵa, júzý daǵdylaryn meń­germegenderge sýǵa jaqyndamaýǵa jáne shekteý belgilerinen ári júz­beý­ge keńes beredi. Eger de qaýip tóngen jaǵdaıda nemese jazataıym oqıǵanyń kýágeri bolsańyz 112 nómirine dereý qońyraý shalǵan jón. Qutqarýshylar ózińizdiń jáne ózgeniń ómirine beıjaı qaramaýǵa shaqyrady. «Saqtansań ǵana saqtaıdy», degen qaǵıdany esten shyǵarmaǵan abzal.

Abaı oblysy