Ataqty jaýyrynshynyń urpaǵy Baýyrjan Táshimov bul jádiger onyń úıinde jarty ǵasyrǵa jýyq saqtalyp kelgenin jetkizdi. Sońǵy ýaqytta jaýyrynǵa suraý salýshylardyń kóptigine baılanysty ony mýzeı qoryna ákelip tapsyrýdy týystarymen aqyldasyp sheshipti.
Sary báıbisheniń shyn esimi – Bıbisary, aýyl-aımaq «Sary ana», keıin ol kisiniń emshiligi men áýlıeligine, el arasyndaǵy abyroıyna oraı «Sary báıbishe» atap ketken. Balalyq ómiri tabıǵaty ásem Kókshe óńirinde ótken.
Buqar jyraý atyndaǵy ádebıet jáne óner mýzeıiniń dırektory Erbol Qaıyrov qasıet ıesine qatysty ańyzdardy terip, zerttep júrgen azamattyń biri.
– Sary anamyz Ereımentaýǵa qonys aýdaryp, sonda syrqattanyp qalady. Aýrý kún saıyn órship, ómirden túńile bastaǵan shaqta, túsine kúmis saqaldy áýlıe enip: «Bul jer saǵan qut bolmaıdy. Elińdi jınap, kósh bastap, Saryarqadan ári assań, Qaraǵaıly ný orman bar. Sol jer seniń mekeniń bolady. Úrim-butaǵyń ósip-ónip, kórkeıesiń. Aýrýyńnan qulan-taza aıyǵasyń. Kúnde keshkisin otardyń sońynda únemi mańyrap keletin sary bas qoı bar, soıyp, etin elge tarat. Oń jaq jaýyryny saǵan ómirde adasqanda jol kórseter, em izdegenderge shıpa bergizer qasıetiń bolmaq. Jaýyryndy qolyńa alǵanda jybyrlap jazý biter, ony tek sen ǵana oqı alasyń. Qoıdy keshkisin soıǵandyqtan, jazý kún batar aldynda ǵana paıda bolady», – dep aıan beredi.
Sary báıbishe áýlıeniń aıtqanyn oryndap, qazirgi Aqqýly aýdanyndaǵy Báıimbet alańyna elin ornalastyryp, keıin ózi jerlenetin jerge qazyq qaǵyp: «Myna jerde meniń otaýym tigilsin, dúnıeden ótkende de osy jerge jerleńder», dep amanat etken», – deıdi mýzeı basshysy.
Sary báıbishe jaýyrynmen tylsym dúnıeniń tilin bilip, bolashaqty, aýa raıy qubylystaryn boljap, halyqqa baǵyt-baǵdar kórsetken. О́ziniń aq quranymen halyqqa em-dom jasap, óńirde Domalaq ana atanǵan. Anamyzdyń aldyna bir perzentke zar bolǵan jas jubaılar, boıyn dert býǵan syrqattar keletin, tipti dýalanǵan jandardy da baryp emdegen.
Murat QAPANULY,
jýrnalıst
Pavlodar oblysy
