Osy rette MQU-lardyń adaldyǵyn aıǵaqtaýǵa kómek beretin bes negizgi qadamdy atap kórsetken jón. Birinshisi – uıymnyń lısenzııasyn tekserý. Ony Qarjy naryǵyn retteý jáne damytý agenttigi arqyly (onyń resmı saıty arqyly da) anyqtaýǵa bolady. Agenttik ruqsatyn almaǵan MQU qyzmetin paıdalanýǵa, ondaı kompanııalar usynatyn bólip tóleý qyzmetterin tutynýǵa, nesıelerin rásimdeýge bolmaıdy. Ekinshi qadam – mıkronesıeni usyný týraly kelisimshartpen muqııat tanysý. MQU-lardyń tutynýshydan qandaı da bir komıssııa ustaýǵa, azamattyń erkinen tys qosymsha qyzmetter tańýǵa (mıkronesıe somasynan ustalyp qalatyndaı etip) quqy joq. Úshinshisi – syıaqy mólsherlemesine nazar aýdarý. «Mıkroqarjylyq qyzmet týraly» zańǵa sáıkes MQU mıkronesıeniń 2 túrin usyna alady:
1) jeke jáne (nemese) zańdy tulǵalarǵa respýblıkalyq bıýdjet týraly zańda tıisti qarjy jylyna belgilengen aılyq eseptik kórsetkishtiń (AEK) 20 myń mólsherinen aspaıtyn mólsherde, qamtamasyz etiletin ne qamtamasyz etilmeıtin mıkrokredıt;
2) jeke tulǵalarǵa respýblıkalyq bıýdjet týraly zańda tıisti qarjy jylyna belgilengen, 50 AEK aspaıtyn somaǵa, kúntizbelik 45 kúnge deıingi merzimge beriletin mıkrokredıtter.
Mıkrokredıttiń birinshi túri boıynsha syıaqynyń jyldyq tıimdi mólsherlemesi (JTSM) jylyna 56%-dan aspaıdy. Al birqatar talapty eskere otyryp, zań boıynsha mıkrokredıtterdiń ekinshi túrine JTSM-niń 56%-y mólsheri týraly talap qoldanylmaıdy.
Tórtinshi qadam – mıkrokredıt boıynsha tólemderdi keshiktirý nesimen qaýip tóndiretinin zerdeleý. Aı saıynǵy nesıe tólemi merzimin ótkizip alý týyndaǵan jaǵdaıda mıkroqarjy uıymynan jasyrynýǵa bolmaıdy. Mıkrokredıtterdi óteýde qıyndyq kórip otyrǵan qaryz alýshylardyń quqyqtaryn qorǵaý úshin 2021 jylǵy 1 qazannan bastap azamattardyń merzimi ótken bereshekterin kredıttik uıymdar úshin mindetti retteý tetigi zańnamalyq túrde engizildi.
«Problemalyq bereshekti sheshý, retteý rásimin bastaý úshin siz kredıtorǵa tıisti ótinishpen júginýińiz qajet. О́tinishte qolda bar rastaıtyn qujattardy qosa bere otyryp, aty-jónin, JSN, baılanys derekterin, mıkrokredıt týraly málimetterdi, merzimin ótkizip alý sebepterin kórsetý qajet. Azamattarǵa yńǵaıly bolý úshin ótinishter jazbasha da, qashyqtan da, ıaǵnı MQU bólimshelerine barmaı-aq resmı ınternet-resýrstar jáne kredıtordyń elektrondyq poshtasy arqyly berile alady. О́tinishti jáne rastaıtyn qujattardy alǵan kúnnen bastap kúntizbelik 15 kún ishinde MQU boryshkerdiń qarjylyq jáne áleýmettik jaǵdaıyn jeke-jeke taldaıdy. Kórsetilgen merzimde sizge kredıtordyń qaryzdy qaıta qurylymdaýmen kelisetini týraly habarlanýy tıis», delingen Fingramota keńesinde.
Besinshi qadam – klıent óz quqyǵyn qorǵaý maqsatynda qarjy retteýshisine júgine alady. Júginýdiń de birneshe nusqasy bar. О́z shaǵymyńyzdy egov.kz elektrondy portaly, eOtinish elektrondy servısi arqyly jáne 1459 nómiri arqyly joldaýǵa bolady. Sondaı-aq «Fingramota Online» mobıldi qosymshasy arqyly konsýltasııa alý múmkindigi de bar.
2022 jyldyń 1 maýsymyndaǵy jaǵdaı boıynsha MQU-lar bergen nesıe kólemi 916 mlrd teńgeden asqan. Jyldyń basymen salystyrǵanda kórsetkish 125,8 mlrd teńgege nemese 15,9 paıyzǵa ósken. Negizgi qaryz alýshylar – jeke tulǵalar.
