Ulttyq akademııalyq kitaphanada Abaı kúnine arnalǵan «Abaı taǵylymy» atty ádebı-merekelik jıyn uıymdastyryldy. Atap aıtsaq, «Abaı álemi» atty keń kólemdi kitap kórmesi men sırek qordaǵy materıaldar usynylǵan kórme ótkizildi. Sondaı-aq elimizge belgili abaıtanýshylardyń qatysýymen ótken dóńgelek ústelde aqyn ómiri men shyǵarmashylyǵy týraly túrli taqyrypta baıandamalar oqyldy. Odan bólek Abaı shyǵarmalaryn mánerlep oqý marafonyna mektep oqýshylary qatysyp, óz ónerlerin kórsetti. Aqyn muralaryn bilýge arnalǵan vıktorınamen jalǵasqan merekelik jıyn basqa da tanymdyq is-sharalarǵa ulasty.
«Ár halyqtyń, ulttyń búgingi kúnmen astasqan máselesin keshegimen, erteńgimen jalǵastyratyn uly tulǵalary bolady. Biz úshin de kóne túrki jazýlary men Abaı ıdeıasy – sondaı uly qundylyq. Sondyqtan da Abaı kúnin atap ótý – ult úshin úlken rýhanı esep. Memleket basshysynyń Jarlyǵymen bıyl úshinshi ret atap ótiletin Abaı kúnine arnalǵan jıynymyzdyń maqsaty – hakim Abaıdyń teńdessiz murasyn halyqqa jetkizý, jas urpaqtyń sanasyna aqyn ıdeıasyn sińirý», deıdi Ulttyq akademııalyq kitaphana dırektory Ǵazıza Qudaıbergenqyzy.
Mádenıet jáne sport mınıstrliginiń qoldaýymen ótken merekelik jıynǵa Qazaqstandaǵy dıplomatııalyq elshilikter, fılologııa ǵylymdarynyń doktory Shákir Ybyraev, kúıshi, kompozıtor Janǵalı Júzbaı, abaıtanýshy, ǵalym Sultan Ybyraı, fılologııa ǵylymdarynyń kandıdaty Erbol Tileshov, abaıtanýshy, ǵalym Ernat Qashqynov jáne basqa da ádebıetshiler men zııaly qaýym ókilderi qatysty.
Sonymen qatar Abaı kúnin elordalyq polıseıler de atap ótti. Mereıli mereke aıasynda Nur-Sultan qalasynyń Polısııa departamenti aqynnyń 177 jyldyǵyna arnalǵan birqatar is-shara uıymdastyrdy. Máselen, departamentte Abaıdyń asyl murasyn nasıhattaıtyn «Tulǵaǵa taǵzym» atty kitap kórmesi qoıyldy. Sondaı-aq departamenttiń vedomstvolyq mýzeı basshysy, tarıh ǵylymdarynyń magıstri Shynar Ýaısova jeke quram arasynda Abaı Qunanbaıulynyń ómirin nasıhattaý, aqynnyń shyǵarmashylyǵy arqyly patrıottyq rýhty tárbıeleý boıynsha dáris ótkizdi.
Aıta keteıik, dáristiń maqsaty – aqyn murasynyń qazaq rýhanııatynda alar orny, urpaq tárbıesindegi mańyzy men onyń qundylyǵy, ulttyq ıdeologııany qalyptastyrýdaǵy róli jóninde keńinen aqparat berý, sol arqyly tártip saqshylarynyń patrıottyq, erlik, jigerlik sezimderin nyǵaıtý bolyp otyr.
Is-shara barysynda polıseıler ǵulama aqynnyń óleńderimen, abaıtanýshylardyń zertteýlerimen tereńirek tanysyp, kúndelikti qarbalas jumystarynan bir ýaqyt alshaqtap, paıdaly maǵlumat aldy.
Abaı kúnine oraı Qazaqstandaǵy AQSh elshiliginiń qyzmetkerleri de Abaı óleńderin oqyp, beınejazba taratty.
«Qazaqstanǵa kelgeli beri biz de hakim Abaı Qunanbaıulynyń óleńderimen tanysýdy jón kórdik. Sonymen qatar úzindi bolsa da keıbirin jatqa aıtqymyz keledi», deıdi Braıan esimdi qyzmetker óziniń beıneúndeýinde.
Atap aıtsaq, AQSh elshiliginiń qyzmetkerleri «Senbe jurtqa, tursa da qansha maqtap», «Qulaqtan kirip, boıdy alar» óleńderin oqysa, al Djon esimdi taǵy bir qyzmetker «Kózimniń qarasy» ánin oryndap berdi.
Aqynnyń týǵan kúnine arnalǵan bul marafon Beıjińde de jalǵasty. Beıjińniń Ortalyq «Chaoıan» saıabaǵyndaǵy «Szıntaı» mýzeıinde Abaı kúnin merekeleý aıasynda Abaı oqýlary ótti. Is-shara 2014 jyly naýryzda Qytaı astanasynyń ortalyǵyndaǵy «Chaoıan» saıabaǵynda ornatylǵan Abaı eskertkishine (avtory – áıgili qytaı músinshisi Iýan Sıkýn) gúl qoıý rásiminen bastaldy.
Abaı oqýlaryn QHR mınıstrlikteri men vedomstvolarynyń, ShYU Hatshylyǵynyń ókilderi, Qytaıdaǵy TMD elderi dıplomatııalyq ókildikteriniń basshylary, qazaqstandyq jáne qytaılyq stýdentter tyńdady. Sondaı-aq mádenı jıyn qonaqtary qazaq jáne qytaı tilderindegi Abaı shyǵarmalarynyń jınaqtarymen tanysty.
Qazaqstannyń QHR-daǵy elshisi Shahrat Nuryshev quttyqtaý sózinde Abaıdyń shyǵarmashylyǵy, onyń qazaq fılosofııasy men ádebı tildi qalyptastyrýdaǵy róline toqtaldy. Elshi 2015 jyldan bastap Beıjiń, Shanhaı, Dalıan jáne Sıan joǵary oqý oryndarynda «Qazaqstan ortalyqtary» men qazaq tili kafedralary ashylǵanyn, onda qazaq ádebıeti, mádenıeti, tarıhy jáne Abaı shyǵarmalary zertteletinin baıandady.
