Erlik sabaǵy

Uly Otan soǵysy adamzattyń esinde máńgi qalady. Adamdarǵa qasiret ákelgen bul soǵysta Uly Jeńis jolynda qanshama boz­daqtyń ómiri qıyldy deseńizshi. Oblystyq IID baspasóz qyzmetiniń derekteri boıynsha, oblystan maıdanǵa alynǵan 2,5 myń mılısııa qyzmetkeriniń tek 440-y elge oralypty. Qazir solardyń arasynan ǵumyr boıy quqyq qorǵaý salasynda eńbek etken bes Uly Otan soǵysynyń ardageri qalypty. Aqtóbelik polıseıler Uly Jeńistiń 69 jyldyǵy qar­sańynda ózderiniń Uly Otan soǵysynyń maıdandarynda er­likpen soǵysqan ardagerlerine qurmet kórsetýde. Oblystyq ishki ister departamenti ardagerler ke­ńesi uıymdastyrǵan «Erlik sa­baǵy» atty kezdesýge ázirge kózi tiri bes maıdangerdiń ekeýi jáne bir eńbek maıdanyna qatysýshy kel­di. Olar oblystyq ishki ister de­partamentiniń murajaıynda jas po­lıseılermen jáne zań ınstıtýty tyńdaýshylarymen kezdesip, maı­­­dan joldarynan estelikter aıtty. Qan qasap maıdan joldarynan ótken Jumaı Álishev fashıstik bas­qynshylardan Kıev, Varshava, Praga, Vena qalalaryn azat etý urystarynda jan alyp, jan berip shaıqasty, Berlındi alýǵa qatysty. Ol eń alǵash zeńbirekshi retinde Kýrsk ıininde nemistermen betpe-bet kelip, urysty. Maıdanda úsh ret jaralandy. Maıdanger soǵys­tan keıin uzaq jyldar boıy zeınetkerlikke shyqqansha quqyq qorǵaý organdarynda jumys istedi. Mıhaıl Dıdenko maıdanǵa 1944 jyly alynypty. On jeti jastaǵy bozbala 5-ekpindi armııa quramynda pýlemet tobynyń ko­man­dıri bolyp soǵysty. Alǵash ret urysqa Mınsk túbindegi Zvat derev­nıasy úshin bolǵan shaıqasta kirdi. Vılnıýsti fashısterden bosatýǵa, Kenıgsbergti alýǵa qa­tysty, jeńisti Pılaý portynda qarsy aldy. Jyl sanap maıdangerler qa­tary sırep barady. Sondyqtan olardyń árbir kezdesýi jastardyń boıynda patrıottyq sezimdi qalyp­tastyrýǵa, urpaqtar sabaq­tastyǵyn saqtaýǵa yqpal jasaıdy. Satybaldy SÁÝIRBAI, «Egemen Qazaqstan». Aqtóbe oblysy.