Aqyn O.Súleımenov «Sóz syry» atty kitabyn tanystyrdy

ALMATY. 9 mamyr. Almatydaǵy «Ǵylym ordasynda» aqyn, jazýshy, qoǵam qaıratkeri Oljas Súleımenovtiń «Sóz syry» («Kod slova») atty jańa kitaby tanystyryldy. Bul týraly Tengrinews.kz tilshisi habarlady. Atalmysh kitap O.Súleımenovtiń «Myń bir sóz» («Tysıacha ı odno slovo») atty etımologııalyq sózdiginiń alǵysózi ispettes. Bilim jáne ǵylym mınıstri Aslan Sárinjipov jańa ǵylymı eńbektiń «Az ı Iа» sııaqty nátıjege qol jetkizetinine senim bildirdi. «Bul kitaptyń onyń 1975 jyly alǵashqy kitaby – «Az ı Iа»-ny tanystyrǵan Ǵylym akademııasynda jarııa etilýiniń sımvoldyq máni bar dep oılaımyn», - dedi mınıstr. «Sóz syry» - etımologııanyń pármendi ádisin baıandaý, ıaǵnı meniń 50 jyl boıǵy zerdeleýim boıynsha sózderdiń shyǵý tórkinin anyqtaý», - dedi Oljas Súleımenov. Ol arnaıy saıttyń kómegimen stýdentterdi osy salaǵa mamandandyrýdy josparlap otyrǵanyn aıtty. Jıynda ǵalymdar jańa eńbek jóninde óz oılaryn ortaǵa saldy. Olardyń paıymynsha, kitaptyń ózekti qoǵamdyq-saıası máni bar jáne oqyrmanǵa tarıh pen tilderdiń shyǵýy týraly jaqsy maǵlumat beredi. «Lıteratýrnyı alıans» qoǵamdyq qory qamqorshylyq keńesiniń múshesi Áýelbek Toqjanov etımologııalyq sózdigin tolyqtyrǵysy keletinderdi jazýshynyń saıtyna kirýge shaqyrdy. «Biz etımologııalyq sózdiktiń kirispesin orys, qazaq, aǵylshyn jáne fransýz tilderine aýdardyq. Osy tilderdiń kez kelgeni arqyly bul kitappen tanysýǵa bolady. Maqsat - álem tilderi sózdigin qurý. Kitap tórt tilde ınteraktıvti rejımde jumys isteıtin bolady. Biz álemdik aýdıtorııadan keri baılanysqa qol jetkizgimiz keledi», - dedi Toqjanov. Aıta keteıik, bul portaldan «Sóz sıpaty» kitabynyń tolyq nusqasyn júktep alýǵa da bolady. Bul saıtta Súleımenovtiń jańa alǵysóz jazylǵan «Az ı Iа» kitaby da bar. Murat Aıtqoja. Derekkóz: Tengrinews.kz. Foto: Tengrinews.kz.