Oblystyq TJD málimetinshe, jyl basynan beri 41 kóliktiń órtený deregi tirkelgen.
«Avtokóliktiń túrli bólshegin únemi tekseristen ótkizip, ásirese, órt qaýipsizdigin baqylaýda ustaý qajet. Alaıda, júrgizýshiler bul talapty eskere bermeıdi. Sonyń saldarynan Atyraý oblysynda bıylǵy 7 aıda 41 avtokólikte órt oqıǵasy tirkeldi. Onyń ishinde 17 júk, 23 jeńil kólikti jalyn sharpydy», delingen departament habarlamasynda.
Avtokóliktegi órttiń shyǵýyna birneshe sebep bar. Máselen, elektr jabdyqtarynyń buzylýynan 28, janar-jaǵar maı júıesiniń aqaýynan 6, kólik salonynda shylym shegýdiń saldarynan 7 kólik órtengen.
Osyǵan baılanysty TJD júrgizýshilerden avkóliktiń tehnıkalyq qaýipsizdigine basa kóńil bólýdi usynyp otyr. Ásirese, órt qaýipsizdigi talaptaryn saqtaý qajet.
«Avtokólikti der kezinde tehnıkalyq baıqaýdan ótkizip, ásirese, elektr jelisiniń symdaryna nazar aýdarylýy tıis. Kólikte órt sóndirgish qural bolǵany jón. Avtokólikte jalyn sharpyǵan jaǵdaıda qozǵalysty tejep, órt sóndirgish quralyn paıdalaný kerek. Jalyndy sóndirýge topyraq pen qumdy paıdalanýǵa bolady. Janarmaı tógilgen jaǵdaıda, lapyldap janyp ketpes úshin oǵan sý men kóbik nemese topyraq seýip tastaǵan durys», delingen habarlamada.
