Soǵys salǵan jaranyń orny áli syzdaıdy. Biz aýyr jaralansaq ta, aman qaldyq. Al myńdaǵan qandy kóılek joldastarymyz týǵan jerdiń topyraǵy da, aýasy da buıyrmaı, maıdan dalasynda bir-bir tómpeshikke aınalyp, qalyp qoıdy. Olardyń da elge qaıtyp kelip, bala súıip, urpaq tárbıeleýine, baqytty bolýǵa, eldiń táýelsizdigin, búgingi beıbit ómirin kórýine tolyq quqy bar edi ǵoı. Olar qyrshyn ketti, biz tiri qaldyq. Qazir qatarymyz da sırep ketti. Qostanaı oblysy boıynsha búginderi 435 maıdanger ǵana Jeńis merekesin atap ótip otyr. Soǵysta erlikpen qaza tapqandardy eske alý, umytpaý, jastardy patrıot etip ósirý – tirilerdiń paryzy. Men maıdanǵa attanǵanda áli 17 jasqa tolmaǵan kezim edi. Jasy jetken er-azamattardy maıdanǵa alyp, biz sekildi balalardy fabrıka-zaýyt ýchılıshesine oqýǵa jiberdi.
Men Qaraǵandydaǵy FZÝ-ǵa oqýǵa bardym. Qasymda eki dosym bar, úsheýmiz maıdanǵa suranyp, áskerı komıssarıatqa talaı bardyq. «Jastaryń jetpeıdi», dep shyǵaryp salady. Birde maıdanǵa soldattar apara jatqan eshelonǵa jasyrynyp minip, tartyp otyrdyq. Bizdiń ýchılıshedegi tárbıeshimiz osy vagonǵa mingen bolatyn, sol kisini de arqa tuttyq-aý deımin. Sonymen poıyz júrip ketken soń, bizdi qaıta túsirip tastamady. Jasymyzdy bir jas úlkeıtip jazyp, sol eshelonnan túspeı, maıdanǵa kirisip ketkenimizdi bir-aq bildik. Soǵystyń qyrǵynyn bastan ótkerdim. Soltústik Batys maıdanda, Kýrsk ıini úshin bolǵan shaıqasta boldym. Ýkraınany azat etý urystaryna, Korsýn-Shevchenko operasııasyna qatystym.
Bul aýyr, shyǵyny kóp urys bolǵany tarıhtan belgili. Sol shaıqasta men aýyr jaralandym. Ata-anama «qara qaǵaz» kelipti. Al meni gospıtaldan shyqqan soń, Poltavadaǵy tank ýchılıshesine jiberdi. Jeńisti sonda júrip qarsy aldym. Máskeýdegi áskerı paradty kórý men úshin úlken qurmet dep bilemin. Qazir árqaısysy bólek el bolsa da, sol kezdegi Keńes Odaǵy quramyndaǵy respýblıkalardyń barlyǵy tize qosyp, fashızmge qarsy birge kúresti. Máskeýdi bizdiń qazaqstandyqtar jaýdan qorǵady. Men paradty tamashalap turyp, maıdandastarymdy eske alamyn.
Eger menen máskeýlikter, paradty qyzyqtaýǵa kelgen ózge de qonaqtar surasa, Táýelsiz Qazaqstanym týraly aıtyp beremin. Máskeýden kelgen soń, Qostanaıdaǵy jastarǵa, balalarǵa parad týraly, Uly Otan soǵysyndaǵy meniń zamandastarym, dostarym jasaǵan erlik ister týraly áńgimeleýden jalyqpaımyn. Olar bizge qarap Otanyn qorǵaıtyn patrıottyq tárbıe alýy tıis. Máskeý parady ózge elde bolsa da, mıllıondardyń soǵysqa, fashızmge ortaq qarsylyǵyn, beıbitshilik tilegin pash etedi.
Qostanaı.
