• 09 Mamyr, 2014

Medal

546 ret

kórsetildi

1 mın

oqý úshin

Egemen Qazaqstan

«Erligi úshin» medali bar tósinde, Maıdangermen syrlasqanym esimde. Bir myń tórt júz on segiz kún jáne tún Osynaý jan júrgen joryq kóshinde. Osynaý jan ómir úshin kúresken, О́mir úshin ólimmenen tiresken. Janardaǵy jan shyraǵy – jaryǵy Jel ótinde myń tirilip, myń óshken. Qandy maıdan, joryqty jol, syz okop, Júreginde jaýǵa degen yza-kek. Týǵan jerde jat turǵanyn oılasa, Boıy sýyr salǵandaı-aq muz ákep. Qart minezi ásheıinde qatal-aq, Nemerege otyrar tek botalap. Qart júregi eljireıdi, medalin Sábı saýsaq sıpaǵanda «atalap». Ordeni joq, jalǵyz ǵana medali, Maqtanysh qyp óńirine taǵady. «Medal ma?!» dep mensinbese keı shirkin, Qyran qabaq qyraýlanyp qalady. Mundaı oıǵa qaıran kóńil jabyrqap, Ondaılarǵa qaraı qalar tańyrqap. «Erligi úshin» degen sózdiń baǵasyn Bastan keshken biledi ǵoı aǵa urpaq. Máskeýińnen joldy tartqan Berlınge, Tolǵan nebir qyrǵyn menen súrginge, Osy qazaq jaýyngerdiń erligi Dastan bolyp jazylǵan-dy ár kúnge. Erlik jasaý oıynda esh bolmaǵan, Bar bilgeni – elin jaýdan qorǵaǵan. Sondyqtan da ár qadamy jeńis bop, Otanyna beıbitshilik ornaǵan. Soǵysyp pa erlik jasaý úshin ol, Týǵan elge satpaıdy áste kúshin er! Otan biraq erligi úshin dep bergen, Sol medaldiń salmaǵyn jurt túsiner... Qorǵanbek AMANJOL. Almaty.