Memleket basshysy qazaqstandyqtardy Jeńis kúnimen quttyqtady

ASTANA. 9 mamyr. Búgin Prezıdent Jeńistiń 69 jyldyǵyna oraı Astanadaǵy «Otan qorǵaýshylar» monýmentine gúl shoqtaryn qoıyp, sol bir surapyl soǵysta qaza tapqan bozdaqtardy bir sát únsizdikpen eske aldy. Sodan keıin Memleket basshysy búkil qazaqstandyqtardy Jeńis kúnimen quttyqtady. Bul týraly egemen.kz habarlady. Jıynda Nursultan Nazarbaev: «Qurmetti qazaqstandyqtar, barshalaryńyzdy búgingi ulyq mereke – Uly Otan soǵysyndaǵy Jeńispen shyn júrekten quttyqtaımyn! Biz - ardagerlerimizdi ardaqtaıtyn, qarttarymyzdy qadirleıtin halyqpyz», – dedi. Sondaı-aq, Memleket basshysy ardagerlerdiń keshegi eren erlikterine toqtala kele: «Ultshyldyq pen fashızmniń ne ekenin bizdiń atalarymyz, aǵalarymyz jaqsy biledi, soǵan qarap jastarymyz birlikke, Otandy qorǵaýǵa  úırense eken deımiz», – dedi. Astanada ardagerler men qala turǵyndary «Otan qorǵaýshylar» monýmentine jınalyp, Jeńis kúnin atap ótýde. Jınalǵan qaýym sarbaz botqasynyń dámin tatyp ári soǵys kezinde shyrqalǵan ánder aıtyldy. Búkil álemdi sharpyǵan, úzilissiz 1418 kúnge sozylǵan bul surapyl soǵystyń bel ortasynda qazaqstandyqtar maıdanda da, tylda da erliktiń jarqyn úlgisin kórsetti. Elimizden maıdan dalasyna 1 mln. 200 myńnan astam jaýynger attandy. Olardyń 600 myńy maıdannan elge qaıtyp oralmady. Joldybaı Bazar. Derekkóz: egemen.kz. Foto: «QazAqparat».