Nursultan Nazarbaev: «Ardagerler ómirlik ónegesimen de qymbat»

ASTANA. 9 mamyr. Astanadaǵy «Otan qorǵaýshylar» alańynda ótken merekelik jıynǵa qatysqan Memleket basshysy Jeńis kúnin esimizden shyǵarmaýǵa shaqyrdy. Bul týraly egemen.kz tilshisi habarlady. Saltanatty sharada Prezıdent ardagerlerimizdiń tek maıdandaǵy erlikterimen ǵana emes, ónegeli ómirlerimen de qurmetti ekenin jetkize otyryp: «Jeńis kúni – Uly mereke. Ákelerimiz ben atalarymyzdyń arqasynda biz búgin beıbit aspan astynda ómir súrýdemiz, qýatty memleket quryp, bolashaqqa senimmen qarap otyrmyz», – dedi. Sondaı-aq, ol ardagerlermen birge tyl eńbekkerlerine de memleket tarapynan múmkindiginshe qoldaý bildirilip otyrǵanyn jetkizdi. Memleket basshysy sóziniń sońynda aramyzda júrgen qart maıdangerlerdiń aman-saý júre berýlerine tilektestigin bildirdi. Prezıdent  «Otan qorǵaýshylar» alańyna ornatylǵan shatyrlar qalashyǵynda qarııalarmen emen-jarqyn áńgimelesti. Joldybaı Bazar. Derekkóz: egemen.kz. Foto: «QazAqparat».