Mınıstrdiń aıtýynsha, vedomstvo birinshi kezekte Memleket basshysynyń tapsyrmalaryn oryndaý boıynsha jumys isteıdi. Ǵylym akademııasyna memlekettik mártebe berý jumystary júrgizilýde.
«Qazir Úkimet janynan arnaıy jumys toby qurylyp, memlekettik mártebe berý, zańnamaǵa ózgerister men tolyqtyrýlar engizý, Ulttyq ǵylym akademııasyn qarjylandyrý, sondaı-aq Ulttyq ǵylym akademııasyna jańa ókilettikter berý boıynsha usynystar ázirleý prosesi júrip jatyr», dedi S. Nurbek «Ǵylym jáne joǵary bilim-2022» forýmynda.
Mınıstrdiń aıtýynsha, qazir ýnıversıtet ǵylymyn damytý mindeti birinshi kezekte tur.
«Búgin biz barlyq ǵylymı-zertteý ınstıtýttarynyń rektorlarymen jáne dırektorlarymen birge ýnıversıtet ǵylymy men irgeli, qoldanbaly ǵylym arasyndaǵy baılanysty qalaı tabýǵa bolatynyn oılastyrǵan birinshi forsaıt sessııasyna qatysyp jatyrmyz. Ýnıversıtetter ǵylymı kadrlardyń qaınar kózine aınalýy tıis», dedi mınıstr.
Budan soń, vedomstvo basshysy elimizdegi ǵylymı kadrlardyń jetispeýshiligine toqtaldy.
«Qazir bizde ǵylymı kadrlar tapshy. Táýelsizdiktiń basynda 52 myńǵa jýyq ǵalym bolsa, 2000 jyldardyń basynda 35 myńǵa jýyq ǵalymnan aıyryldyq. Qazir ǵylymı-zertteý ınstıtýttary men ýnıversıtetterde 22 myń ǵylymı qyzmetker jumys isteıdi. Bizdiń mindetimiz – jastardy qoldanbaly jáne irgeli ǵylymǵa tartý», dep atap ótti Saıasat Nurbek.
