Búgin Dúnıejúzilik banktiń Ortalyq Azııadaǵy óńirlik dırektory Tatıana Proskýrıakova men Premer-Mınıstrdiń orynbasary – QR Qarjy mınıstri Erulan Jamaýbaev jeke sektordyń básekege qabilettiligin arttyrý jáne koronavırýs pandemııasynan keıin Qazaqstan ekonomıkasynyń turaqty qalpyna kelýin qamtamasyz etý úshin 345,7 mln eýro somasyndaǵy qaryz týraly kelisimge qol qoıdy.
Atalǵan kelisimdi Dúnıejúzilik Banktiń Dırektorlar keńesi ótken jyldyń jeltoqsanynda maquldady, al tıisti Jarlyqqa Memleket basshysy Qasym-Jomart Toqaev 2022 jylǵy 2 shildede qol qoıǵan.
«Qaryzdyń uzaq merzimdi sıpaty jáne neǵurlym tómen paıyzdyq tólemder syrtqy boryshty óteýdiń ortasha merzimin ulǵaıtý jáne qaryz alýdyń ortasha qunyn tómendetý esebinen el boryshy beıininiń jalpy qurylymyn jaqsartady. Qaryz sheńberinde usynylatyn qaraja Úkimettiń bıýdjettik qajettilikterin qarjylandyrýdy qoldaıdy», delingen Dúnıejúzilik bank habarlamasynda.
Alynǵan qaryzdy óteý merzimi 11,5 jyldy quraıdy. Sondaı-aq jeńildik kezeńiniń qosymsha 2,5 jyly qarastyrylǵan.
Aıta ketsek, Qazaqstan Dúnıejúzilik bank tobyna qosylǵan sátten bastap sońǵy 30 jyl ishinde elge usynylǵan qoldaý kólemi 8,6 mlrd AQSh dollarynan asty.
