Memlekettik tildi meńgerý – ortaq mindet

Men polıak etnosynyń ókilimin. Túpki tamyrym burynǵy Kókshetaý oblysynan bastaý alady. Sol jerge kezinde bizdiń áýletti, atamdy jer aýdarǵan eken. Men de Kókshede týyp, ásker qatarynan keıin Pavlodar oblysyna qonys aýdardym. Osy jerdegi Assambleıa qataryna 39 jasymda kelippin. Qazir, mine, 21 jyl boıy osy  Qazaqstan halqy Assambleıasynyń oblystyq bólimshesinde qyzmet jasap kelemin. Osy jolǵy  Elbasy Nursultan Nazarbaevtyń tóraǵalyǵymen ótken Assambleıa sessııasy ómirimdegi umytylmas kezeńderdiń birine aınaldy. Sebebi, Elbasynyń qolynan marapatqa ıe bolyp, qýanyshqa bólendim. Prezıdent elimizdegi ártúrli ult ókilderiniń mádenıetin, salt-dástúrin, tilin, dinin damytyp, jańǵyrtýdy jáne el ishindegi birlikti saqtaýdy oılaıdy.  Álbette, ótken kezeńniń  jaqsy-jaman degendeı tustary boldy. О́ıtkeni, men de sol kezde kópshilikpen birge  bilim alyp, oblys ortalyǵyndaǵy Indýstrııalyq ınstıtýtyn bitirdim. Keıin árbir  etnostyń ulttyq  mádenıetin,  tilin, salt-dástúrin qaıta jańǵyrtý rýhy, Assambleıanyń erekshe lebi esken  bizdiń elimizdiń táýelsizdik alǵan jyldary bastaldy. Qazirgi tańda elimizde 820 etnomádenı birlestik bar eken. Olardyń qatarynda 70 myńnan astam belsendi etnos ókilderi qyzmet atqarýda. Barlyǵy da tek qana el birligin saqtaý maqsatyn kózdeıdi. Al, bizder, qoǵamdyq birlestik músheleri, memleketimizdegi ulttar dostyǵyn, beıbitshilikti saqtaýda óz jolymyzdy tańdadyq dep oılaımyn. Igi isterimizdi Qazaqstan halqy Assambleıasy atty biregeı ınstıtýt arqyly júzege asyrýdamyz. Eń bastysy – qazaq jerinde  turyp jatqan soń túrli mádenıetti baılanystyratyn memlekettik til – qazaq tili bolýy tıis. Jappaı jumyla memlekettik tildi meńgerý bizdi biriktire túsýi tıis. Vıtalıı SVINSISKII, «Polonııa» polıak etnomádenı birlestiginiń tóraǵasy. PAVLODAR.