Sherý

Dańq memorıaly alańy keýdesi orden men medalǵa toly qarııalar men qyp-qyzyl gúl shoqtaryn us­taǵan nópir halyqqa toly boldy. О́ńir basshysy B.Saparbaev pen ob­lystyq ardagerler keńesiniń tóraǵasy G.Berdıýgın bastaǵan oblys ortalyǵynyń jurtshylyǵy, áskerı bólimder, kásiporyndar men mekemelerdiń ókilderi bar taǵzym etýshilerdiń qalyń qatary surapyl soǵysta qan tókken maıdangerler rýhyn eske alyp, Máńgilik alaýǵa gúl shoqtaryn qoıdy. Búginde О́skemende 240 UOS ardageri, 8051 tyl eńbekkeri turady. Shyǵys óńirinen maıdanǵa 170 myńǵa tarta adam attansa, olardyń arasynda soǵys dalasynda ajal qushyp, habarsyz ketkenderdiń ózi 96 myńǵa jýyq. Shyǵysqazaqstandyqtar atalǵan soǵysta asqan erlik kórsetkenin óńirden attanǵan 109 jaýyngerdiń Keńes Odaǵynyń Batyry ataǵyna ıe bolǵanynan bilýge bolady. Sondaı-aq, 24 jerlesimiz «Dańq» ordeniniń tolyq kavaleri boldy. Bul – Batyr ataǵyna teńestirilgen jaýyngerlik joǵary marapat. 30 myńǵa jýyq sarbazdar túrli dárejedegi ordendermen, medaldarmen, 9 myń tyl eńbekkeri «Uly Otan soǵysyndaǵy qajyrly eńbegi úshin» medalimen marapattaldy. Jeńis rýhyn aıshyqtaǵan saltanatty mereke Respýblıka alańynda áskerı sherýmen jalǵasty. Sherýdi ishki ister mınıstrligi ulttyq ulanynyń «Shyǵys» óńirlik qolbasshylyǵynyń qolbasshysy, general-maıor Baýyrjan Ábjanov basqardy. «Shyǵys» óńirlik qolbasshylyǵynyń ofıserleri, 5518 áskerı bóliminiń qyzmetkerleri, tótenshe jaǵdaılar departamentiniń ofıserleri men Aýǵan soǵysynyń ardagerleri, D.Serikbaev atyndaǵy ShQMTÝ áskerı kafedrasynyń stýdentteri jáne О́skemen qalasyndaǵy «Qaharman», «Tulpar», «Juldyz-Zvezda», «Aıbyn» áskerı-patrıottyq klýbtarynyń músheleri bar 15 kolonna sap túzegen saltanatty sherý barysynda ártúrli taqyrypta bezendirilgen júk kólikteri Uly Otan soǵysyndaǵy sheshýshi urystardy beınelegen kórinister usyndy. Máselen, «Brest qorǵany», «Máskeý úshin shaıqas», «Kýrsk shaıqasy», «Lenıngrad qorshaýy», «Berlındi alý» jáne búgingi beıbit ómirdi beınelegen «Máńgilik El» kórinisteri alapat soǵys pen ata-babalarymyzdyń beker qan tókpegenin utymdy kórsete bildi. Saltanatty sherýdi ulttyq ulannyń 5518 áskerı bóliminiń orkestri marshtyq áýendermen súıemeldedi. – Búgingi zaman ókilderi el egemendiginiń, beıbit ómirdiń qalaı kelgenin umytpaýy kerek. Biz, ata-ájelerimiz, áke-analarymyz, aǵalarymyz aldynda boryshtarmyz. Soǵystyń qaıǵysy, qasireti kóp bolady. Sondyqtan Otan úshin janyn qıǵan aǵa býyn erligi, eńbektegen baladan eńkeıgen qarııaǵa deıin etken ólsheýsiz eńbek esh ýaqytta umytylmaıdy, – dedi óńir basshysy B.Saparbaev. Sonymen qatar, Jambyl atyndaǵy saıabaqta UOS ardagerleri men tyl eńbekkerleri sarbaz botqasynan dám tatyp, áskerı-patrıottyq ánderdi shyrqady. Al Ertis jaǵasyndaǵy amfıteatrda «Jeńis rekordy» sporttyq aksııasy ótti. Onda Uly Otan soǵysynan beri ótken 25203 beıbit kúnniń qurmetine atalǵan sandyq kórsetkishpen saı keletin dene kúshin synaýdan, beltemirde oınaýdan jáne gir tasyn kóterýden sporttyq jarystar ótti. Jeńis merekesi Ertis jaǵasyndaǵy barqyt aspandy sansyz juldyzdarǵa bólegen otshashýmen aıaqtaldy. О́SKEMEN.