Erlik laıyqty baǵalanǵan kún

Jambyl topyraǵynan Uly Otan soǵysyna 120 myńǵa jýyq jaýynger attanyp, taǵdyr sonyń 32 myńyna týǵan jerge qaıta oralýdy jazbapty. «Er esimi – el esinde» degen, keýdelerin oqqa tosyp, Otany úshin janyn pıda etken bul jaýyngerlerdiń esimi, erligi árdaıym eldiń esinde qalary sózsiz. Taraz tórinde ótken Jeńis meıramy ot pen oqtyń ortasynda arpalysqan batyrlarymyzdyń erligin ulyqtap, taǵzym etýden bas­taldy. Ortalyq «Dostyq» alańynda ótken merekelik jıynda oblys ákimi K.Kókirekbaev ardagerlerdi Jeńis merekesimen quttyqtap, jas­tar jaǵy keleshek urpaqtyń beıbit ómiri úshin qolyna qarý ustaǵan, búginde kózi tiri maıdangerlerge qurmet kórsetti. Soǵys jyldarynan túrli teatrlandyrylǵan kórinister qoıyldy. Búgingi táýelsiz elimizdiń ásker sapyndaǵy úzdik sarbazdar kásibı sheberlikterin kórsetip, sońy konserttik baǵdarlamaǵa ulasty. Bıyl 90 jasqa tolyp otyrǵan qart maıdanger Jumanáli Pazylbaev áskerge 1942 jyly shaqyrylyp, Volhov, Lenıngrad, Smolensk baǵytynda qan maıdanǵa qatysypty. Keıinnen Mınsk, Kıshınev qala­larynda, Ýkraına, Estonııa, Latvııa, Lıtva elderin azat etý úshin aıanbaı shaıqasqan. 1948 jyly elge oralǵan ol ishki ister organdarynda basshylyq qyzmetter atqardy. Tipti, zeınetke shyqqannan keıin de qol qýsyryp qarap otyrmaı, qaladaǵy qarttar úıinde qyzmet etti. Jeńis meıramy qarsańynda oblys ákimi K.Kókirekbaev el basyna kún týǵanda qolyna qarý ustap qorǵap, beıbit kúnde eseli eńbegimen úles qosqan qart ardagerdi arnaıy baryp quttyqtap, syı-sııapat jasady. Sondaı-aq, bul kúni oblys bas­shy­lyǵy taǵy da birqatar ardagerlerdiń úıinde boldy. Bul kúni oblys ortalyǵynda konserttik baǵdarlama, soldat botqasyn taratý, eskertkishterge gúl shoqtaryn qoıý rásimi ótip, áskerı tehnıka kórmesi uıymdastyryldy. Oralhan DÁÝIT, «Egemen Qazaqstan». Jambyl oblysy.