«Sberbank Qazaqstan» quryltaıshylary ózgeredi

«Báıterek» ulttyq basqarýshy holdın­gi men Sberbank tobymen Qazaq­stan­daǵy («Sberbank» AQ EB) Sber aksııalarynyń barlyq paketin satyp alý-satý mámilesine qol qoıǵanyn resmı jarııalady.

«Sberbank qazirgi geosaıası jaǵdaıdy basshylyqqa ala otyryp jáne enshiles bank klıentteriniń múddesi úshin áreket ete otyryp, qazaqstandyq naryqtan shyǵý týraly sheshim qabyldady. «Sberbank Qa­zaq­stan» ótimdiliktiń jetkilikti qo­ry­na, joǵary sapaly kredıttik qor­jy­­nyna ıe jáne kóptegen jyl bo­ıy Qazaq­stannyń qarjy naryǵynyń ne­giz­gi qa­ty­sýshylarynyń biri boldy. «Sber­bank Qazaqstandy» satyp alý týraly sheshim qabyldaı otyryp, «Báı­terek» holdıngi onyń eldiń qarjy júıesi úshin joǵary mańyzdylyǵyn baǵalady. Bank ıelenetin qazirgi zamanǵy ınfraqurylym men tehnologııalar qysqa merzimde bank­ti tolyq jumysqa qaıtarýǵa jáne Qa­zaqstan ekonomıkasynyń naqty sektoryn qarjylandyrýdy bastaýǵa múmkindik beredi», delingen holdıng habarlamasynda.

Bank klıentter aldyndaǵy barlyq mindettemesin oryndaýdy jalǵastyra beredi. Klıentteri úshin bank ónimderi boıynsha búkil shart ózgerissiz qalady. Mámile arqyly bank belsendi operasııa­lardy tolyq kólemde jańartyp, de­po­zıt­ter tartyp jáne tólemder júrgi­ze­di, sondaı-aq halyq pen bıznes úshin ónimder men qyzmetterdi damytýdy jal­ǵas­tyrady. Habarlamada aıtylǵandaı, Qazaqstan naryǵynda klıenttermen ózara is-qımyldyń 15 jyldan astam tájirıbesi jınaqtalǵan «Sberbank Qazaqstan» qyz­met­kerleriniń kásibı komandasy óz ju­mysyn jalǵastyra beredi. Taraptar má­mileni jaqyn arada jabýdy josparlap otyr.

Sondaı-aq enshiles banktiń ataýy da ózgermek. «Sberbank Rossııa» AQ enshiles banki 19 tamyz kúni dalabank.com.kz degen domendik ataý tirkegen. Budan bólek, sol kúni dalainfo.kz, dalaipoteka.kz, dalatravel.kz, dalacredit.kz, dalaauto.kz, dalabusiness.kz, dalainvest.kz degen domender de qurylypty. Atalǵan ınstıtýt jaǵdaıǵa qatysty eshqandaı pikir bermegenimen birneshe domenniń tirkelgenin rastady.

«Báıterektegi» bizdiń áriptesterimizdiń habarlaýynsha, menshik kapıtalynyń qubylyp turǵanyna qaramastan bank dıvıdend tóleıdi. Bizdińshe, teris kapıtalǵa ıe banktiń dıvıdend tóleýi qıyndaý. Oıymyzsha, mámileniń saıası máni basym bolǵandyqtan bank dıvıdend tóleýdi jón dep sheshken sııaqty. Jaqyn arada Sberge jańa komanda taǵaıyndalyp, ataýy ózgerýi múmkin. Buǵan deıin bankti «Báıterek» basshylyǵyna jaqyn mańdaǵy tulǵalardyń biri basqarýy múmkin degen edik. Kóp adam bank basshylyǵyna «Báıterek» tóraǵasynyń orynbasary Ádil Muhamedjanov keledi dep sanaıdy. Sońǵy aılarda komanda jınaqtalyp, ásirese sońǵy aptalarda bul prosess belsendi júrgizilgen. «Báıterek» Sberdi satyp alǵannan keıin orta merzimdi pers­pektıvada qarjy ınstıtýtyn tıimdi ba­ǵada satyp jiberýdiń qamyn jasaıdy dep úmittenemiz», dep boljam bildiredi telegramdaǵy Risk Takers kanaly.

Eske salsaq, bıyl 23 maýsymda Senat otyrysynda Qarjy naryǵyn retteý jáne damytý agenttiginiń tóraǵasy Mádına Ábilqasymova «Báıterektiń» Sbermen kelissóz júrgizip jatqanyn habarlap, mámile júzege asqan jaǵdaıda banktiń 100 paıyz aksııasy satyp alýshy tarapqa ótedi dep málimdegen edi. «Bul jańa bank lısenzııasyn alýdy talap etpeıdi. Iаǵnı jańa bank paıda bolmaıdy, tek aksıoneri ǵana aýysady» degen bolatyn M.Ábilqasymova.

Bank baspasóz qyzmeti osyǵan deıin qazaqstandyq Sberbanktiń yqtımal defolt jáne bankrottyq jaǵdaıy týraly pikir bildirgen edi.

«Defolt, bul – kelisimshart boıynsha mindettemeni oryndamaý, ıaǵnı esep aıyrysý úshin aqshanyń joqtyǵy. «Sberbank Qazaqstan» óziniń barlyq mindettemesin oryndaýda: ótimdilik pozısııasy barlyq mindettemeden eki ese asyp túsedi. Bul jerde kapıtal kórsetkishi eshqandaı ról oınamaıdy. Bankrottyq – boryshkerdiń esep aıyrysýǵa jetkilikti qarajatynyń joqtyǵynan óz mindettemelerin tolyq oryndaı almaýy. Sol sebepti «Sberbank Qazaqstanda» bankrot pen defolt táýekeli joq. Kredıtor, salymshy, sondaı-aq memlekettik baǵdarlama boıynsha barlyq mindetteme jasalǵan kelisimshartqa sáı­kes tolyq kólemde atqarylyp jatyr. Bank operasııalaryn júrgizý boıynsha «Sberbank» AQ EB lısenzııa ótkizýdi qarastyryp otyrǵan joq. 12 qazanǵa deıin jaramdy OFAC lısenzııasyna sáıkes aksıonerdi ózgertý týraly aldaǵy mámile Sber tobyna qatysty sanksııalarmen baılanysty «Sberbank Qazaqstan» operasııalaryna shekteýlerdi alyp tastaýǵa múmkindik beredi. Mámile ekonomıka men halyqty nesıeleý esebinen sońǵy tórt jylda aktıvi belsendi túrde ósken bankti naryqqa qaıta alyp keledi», dep málimdeıdi baspasóz qyzmeti.

Sberbank Qazaqstan naryǵyna alǵash ret 2006 jyly aıaq basty. 2007 jyly bank operasııalaryn júrgizýge ruqsat aldy jáne óziniń jarǵylyq kapıtalyn 15 ese arttyrdy (29 mlrd teńgege nemese 240 mln dollarǵa deıin). Bul onyń otandyq bank sektorynda birden úzdik ondyq qataryna kirýine jol ashty. 2021 jyldyń qorytyndysy boıynsha shaǵyn jáne orta bıznes pen bólshek sektorǵa bergen nesıesi bank portfeliniń 75 paıy­zyn enshiledi.

Atap óteıik, 2018 jyldyń 1 qańtary­nan 2022 jyldyń 1 qańtaryna deıingi aralyq­ta bank aktıvi 1,75 trln teńgeden 4,22 trln teńgege kóbeıgen. Al bıyl 1 shilde­de aktıvter kólemi 2 trln teńge­ge kúrt qysqaryp ketti. Sondaı-aq bank «Baspana Hıt» ıpotekalyq baǵ­darla­ma­syna, Qazaqstan damý bankiniń jeńil­de­tilgen avtonesıeleý baǵdar­la­ma­sy­na, «Damý» qorynyń «Bıznestiń jol kartasy – 2025» jáne basqa da memlekettik baǵdarlamalarǵa belsene aralasty.

Buǵan deıin AQSh Qarjy mınıstrligi sheteldik aktıvterdi baqylaý basqarmasy (OFAC) «Sberbank» AQ EB-men mámileni aıaqtaý boıynsha merzimdi 2022 jyldyń 12 shildesinen 2022 jyldyń 11 qazanyna deıin uzartyp bergen edi. Osy merzim aralyǵynda «Sberbank Qazaqstan» shtatty rejimde jumys isteıdi. Al onyń klıentteri tólemder men aýdarymdarǵa qatysty kez kelgen operasııany qandaı da bir shekteýsiz júzege asyra alady.