Vedomstvo basshysy jańa jobanyń mańyzy men maqsatyn túsindirip berdi.
«Bul – Qazaqstanda buryn-sońdy bolmaǵan, tipti álemde teńdesi joq marafon-báıge. Sondaı-aq bul alaman jaı ǵana at jarysy emes – qazaq halqynyń salt-dástúrin jańǵyrtatyn, rýhyn oıatatyn, Qazaqstannyń baı tabıǵaty men tarıhyn zerdeleıtin, jańa týrıstik baǵyttardy qalyptastyratyn tyń joba bolmaq. Bul báıge bolashaqta ózimizdiń at ústindegi dástúrli «Parıj Dakarymyz, Týr de Fransymyz» bolady dep úmittenemin», dep jazdy Dáýren Abaev Facebook-tegi paraqshasynda.
Marafon 17 qyrkúıekte Nur-Sultan qalasynda bastalyp, 29 qyrkúıekte Túrkistanda aıaqtalady dep josparlanyp otyr. Oǵan elimizdiń ár óńirinen bir komanda qatysady.
Bas júldeniń jeńimpazy 30 mln teńge, 2 oryn ıegeri – 20 mln teńge, 3 oryn úshin 15 mln teńge utyp alady.
