«Astana-Invest-2014» forýmynda elordaǵa ınvestısııa tartý máselesi qaralady

ASTANA. 12 mamyr. 21 mamyrda Astanada «Astana-Invest-2014» V Halyqaralyq ınvestısııalyq forýmy ótedi. Bul týraly egemen.kz tilshisi habarlady. Bul jıyn osyǵan deıin habarlaǵanymyzdaı, 21-23 mamyr aralyǵynda ótetin VII Astana ekonomıkalyq forýmy aıasynda uıymdastyrylǵaly otyr. «Astana-Invest» forýmy Úkimettiń qoldaýymen jáne tikeleı yqpal etýimen jyl saıyn ótkizilip keledi. Muny qolǵa alýdaǵy negizgi maqsat – Astanany damytý, oǵan ınvestısııalar tartý, halyqaralyq yntymaqtastyqty arttyrý jáne qalanyń tartymdylyǵyn nasıhattaý. Naqtylaı aıtqanda, elordanyń  ınvestısııalyq múmkindikterin kórsete otyryp, otandyq jáne sheteldik kompanııalardy ınvestısııa quıýǵa yntalandyrý kózdelgen. Forýmǵa 400-ge jýyq adam qatyspaq. Olardyń arasynda ulttyq kompanııalardyń, damý ınstıtýttarynyń, sheteldik kompanııalar men qarjylyq qurylymdardyń ókilderimen qatar, astanalyq kásipkerler de bolady. Bul basqosýda Expo-2017 halyqaralyq kórmeciy ótkizýge elorda ınfraqurylymyn daıyndaý men birqatar ózge de máseleler kún tártibine shyǵarylady. Budan bólek, forýmǵa qatysýshylar qalanyń ındýstrıaldyq parkin kórý kezinde ınvestısııalyq jobalarmen de keńinen tanysa alady. Joldybaı Bazar. Derekkóz: egemen.kz. Foto: astana.gov.kz.