Kók Túrik tarlandary

Mádenıet jáne sport mınıstrligi, Al­maty qalasynyń ákimdigi, Qazaqstan ar­da­gerleri qaýymdastyǵy jáne Amanat par­tııasynyń muryndyq bolýymen uıym­das­tyrylǵan dástúrli dodaǵa Nur-Sultan, Al­maty, Shymkent qalalary, Al­maty, Jetisý, Túr­kistan, Jambyl, Qyzyl­orda, Aqtóbe, Qos­tanaı, Atyraý jáne Mańǵystaý oblystarynan kelgen sport­shylar qatysty. Olardyń arasynda halyq­aralyq jáne respýblıkalyq jarystarda júlde alyp júrgen sportshylar da boldy.

Atalǵan is-sharanyń ashylý saltanatyna Parlament Májilisiniń depýtaty, Unifight ámbebap jekpe-jek federasııasynyń pre­zıdenti Baqytbek Smaǵul, sol uıymnyń vıse-prezıdenti Oljas Ákimov, Amanat partııasy Almaty qalalyq fılıaly tóraǵasynyń orynbasary Qaırat Bısembaev, Almaty qala­lyq sport basqarmasy basshysynyń orynbasary Bekjan Onjan, AOSK-nyń basshysy, Olımpıada chempıony Olga Shıshıgına jáne taǵy basqa azamattar men sport ardagerleri qatysty.

– «Kók Túrik tarlandary» degen ataýǵa ıe bolǵan jarystyń máni de, mańyzy da zor. Onyń negizgi maqsaty – Qazaqstan Respýb­lıkasy Qarýly Kúshteriniń qatarynda óziniń jaýyngerlik uranyn aıta alatyn, táýel­sizdiktiń turaǵy bolýǵa jaraıtyn jalyndy ári aıbyndy jastardy otansúıgishtik rýhta tárbıeleý. Osy prınsıpti basshylyqqa ala otyryp, jyl saıyn osyndaı keremet is-shara uıymdastyryp kelemiz. Bul jarysqa Qarýly Kúshterden bólek, Ulttyq qaýipsizdik komıteti, Memlekekettik kúzet qyzmeti, Ishki ister mınıstrliginiń sardarlar men sarbazdary da qatysýda. Sebebi pyshaq laqtyrý, kedergilerden ótý, nysana kózdeý jáne jek­­pe-jekke shyǵý áskerı sanatqa jaqyn sport túrleri ekeni belgili. Olaı bolsa, biz rýhy myqty, óresi bıik, qandaı qıyndyq bolsa da jigeri jasymaıtyn, saǵy synbaı­tyn saıypqyrandardy tárbıeleýimiz kerek. Bir sózben aıtsaq, Qazaqstannyń Qa­rýly Kúshteri álsiz bolmaýǵa tıis, – dedi Parlament Májilisiniń depýtaty, Aýǵan so­ǵysynyń ardageri, Unifight ámbebap jekpe-jek federasııasynyń prezıdenti Baqytbek Smaǵul.

ALMATY