Kezdesý barysynda Qazaqstan men Germanııa arasyndaǵy saýda-ekonomıkalyq jáne ınvestısııalyq yntymaqtastyq máseleleri talqylandy.
Memleket basshysy Germanııa Úkimeti men bıznesi ókilderine iltıpat bildire otyryp, elimiz energetıka, ónerkásip, aýyl sharýashylyǵy, kólik jáne logıstıka, bilim, ǵylym jáne tehnıkalyq baǵyttaǵy kadrlardy daıarlaý sııaqty negizgi salalar boıynsha seriktestikti tereńdetýge múddeli ekenin atap ótti.
Qazirgi ýaqytta Úkimet 800 áleýetti ınvestısııalyq jobadan quralǵan jobalar pýlyn daıyndady. Sondaı-aq Qazaqstan Germanııa kompanııalaryn elimizge tartý úshin qolaıly jaǵdaı jasaýǵa daıyn.
«Germanııa – Qazaqstannyń Eýropa Odaǵyndaǵy eń mańyzdy seriktesi. Qazaqstanda Germanııa kapıtalynyń úlesi bar 600-den astam kásiporyn tabysty jumys istep jatyr. Saýda-sattyqty arttyryp, ınvestısııa kólemin ulǵaıtý úshin mol áleýet bar», dedi Qasym-Jomart Toqaev.
Sonymen qatar Prezıdent Germanııanyń tehnıkalyq mamandyqtar boıynsha kadr daıarlaý tájirıbesine qyzyǵýshylyq bildirdi. Atap aıtqanda, Qazaqstan otandyq mamandardyń deńgeıin kóterý úshin Germanııanyń tehnıkalyq ınstıtýttary ókildikterin, zerthanalaryn, ǵylymı jáne quzyret ortalyqtaryn ashý múmkindigin qarastyryp jatyr.
Delegasııa basshysy Qazaqstan men Germanııanyń úkimetaralyq komıssııasynyń teń tóraǵasy Domınık Shnıhels eki eldiń memlekettik organdary men bıznes qurylymdary arasyndaǵy is-áreket deńgeıine joǵary baǵa berdi. Sondaı-aq ol germanııalyq kompanııalarmen jumys isteıtin Úkimettegi arnaýly toptyń tıimdiligin atap ótti.
Delegasııa ókilderi nemis bıznesi Transkaspıı kólik dálizin damytýǵa, ken oryndaryn ıgerýge jáne energetıkalyq sektordaǵy yntymaqtastyqty nyǵaıtýǵa qyzyǵýshylyq bildiretinin jetkizdi.
