Tilsiz jaýdyń munshalyqty jıilep ketýine sebep, aptalap turǵan ystyq. Shyǵysta jazda bolmaǵan ystyq boldy. Buta-qaraǵan shı tıse, syr ete túserdeı keýip tur. Zaısan aýdany, Aınabulaq aýyldyq okrýgi aýmaǵynan shyqqan órt týraly aqparat Tótenshe jaǵdaılar qyzmetine 3 qyrkúıekte kelip túsken. О́rt sóndirýshiler oqıǵa ornyna ileshala jetkenimen, qurǵaq shópti qýalaı sharpyǵan qyzyl jalyn dalaly jerlerge tez taraǵan. Bálkim, órt sóndirý tehnıkalary saǵattaı saqyldap turmaǵan soń da jalyn ońaıshylyqpen boı bermedi me, kim bilsin?!
Oblystyq TJD mamandarynyń aıtýynsha, Zaısan dalasynan shyqqan órtti sóndirý úshin quramnan 16 adam, 4 tehnıka jumyldyrylǵan. Ormanshylardan 30 qyzmetker jáne 6 tehnıka órtpen kúresken. Mamandardyń sózine súıensek, jalańdaǵan jalyndy sóndirý ońaı bolmaǵan. Údegenniń ústine údeı túsken. Nege desek, birinshiden, ot shyqqan jerge jetý qıyn bolsa, ekinshiden jeldiń kúshi otty odan saıyn yshqynta túsipti. Abyroı bolǵanda, ekpindeı túsken órt eldi mekenge jetpeı sóndirildi. Bar kúshin salǵan órt sóndirýshiler, ormanshylar 17 saǵat, 25 mınýtta órtti aýyzdyqtaı alǵan. Ertesi esep júrgizgen mamandar 45 gektar jerdi otqa oranǵanyn anyqtady. Az jer emes. О́rttiń shyǵý sebep-saldaryn anyqtaý arnaıy mamandardyń mindeti.
Zaısan aýdanyndaǵy alapat órt sóndirilgeni sol edi, tilsiz jaý Altaı aýdanynyń taýly aýmaqtaryn sharpydy. Mundaǵy órtti sóndirýge «Zyrıan orman sharýashylyǵy» KMM, «Bykov» ormanshylyǵy aýmaǵyndaǵy ormanshylar, TJD órt sóndirýshileri, jergilikti atqarýshy organdar jumyldyryldy. Aldyn ala boljam boıynsha órt alańy 367 gektarǵa jaıylǵan. Onyń ishinde 167 gektar ormansyz aımaq bolsa, 200 gektar aýyldyq okrýgtiń jerleri.
«Qazavıaormanqorǵaý» AN-2 ushaǵy áýeden de barlap kórip, eldi mekenderge qaýiptiń joqtyǵyn anyqtady. Eń jaqyn aýyl órtke oranǵan jerden 25 shaqyrym eken. Biraq mundaıda arqany keńge salýǵa bolmaıdy. Jel kúsheıse, 25 shaqyrymdy áp-sátte órteń dalaǵa aınaldyrady.
Boı bermegen órtti sóndirý úshin «Qazavıaormanqorǵaý» MM-nen 340-tan astam adam men 25 tehnıka jumyldyryldy. Qosymsha sýaǵar qurylǵysy bar ShQO AP MI-8 tikushaǵy iske qosyldy. Qazirgi tańda oblystyń TJD-de jáne órt ornynda jedel shtabtar jumys isteıdi. Jaǵdaı baqylaýda. О́rt tolyq aýyzdyqtala qoıǵan joq. Bárinen de jaıqalǵan ormanǵa, qulpyrǵan tabıǵatqa obal. О́rtten jerdiń jaqyn on jyldyqta qalpyna kelmeıtini jáne bar. Sol úshin de ormandy jerge barǵanda jaqqan otty ábden sóndirip júrgen abzal. Bir tal sirińke myńdaǵan gektar ormandy otqa oramasyna kim kepil?! Sondyqtan asa abaı bolý kerek.
Shyǵys Qazaqstan oblysy
