Buǵan deıin Qazaqstan Prezıdentiniń Joldaýy jylyna bir-aq ret jarııalanyp kelse, Qasym-Jomart Kemeluly bıyl el nazaryna eki Joldaý usyndy. Munyń ózi tarıhı reformalar aldynda turǵan elimizdiń saıası samarqaýlyqtan arylýǵa bet burǵanyn kórsetse kerek. О́ıtkeni álemdi abdyratyp otyrǵan geosaıası ahýaldyń salqyny bizdiń eldi aınalyp ótýi múmkin emes. Búgingi Joldaý osynaý syn-qaterler yqpalyna qarsy turý sharalaryn qamtýymen daralandy.
Ádiletti Qazaqstan qurýdyń sara jolyn salmaqtaǵan Prezıdent Joldaýy el ekonomıkasynyń tarıhı múmkindikterin tamyrynan taldap, damý nátıjelerin qarapaıym halyq kórýi kerektigin naqtylap berdi. Máselen, Ulttyq qordaǵy ınvestısııalyq túsimniń 50 %-yn 2024 jyldan bastap elimizdiń 18 jasqa tolmaǵan azamattarynyń jeke esepshotyna aýdarýy, áıelderdiń zeınetke shyǵý jasy 61 bolyp belgilenýi eldegi áleýmettik teńsizdikti joıýǵa, el baılyǵy ıgiligin barlyq azamattar kórýine septigin tıgizeri daýsyz.
Sondaı-aq sot júıesi men quqyq qorǵaý salasyn, aýyl sharýashylyǵy sektoryn reformalaý boıynsha usynylǵan negizgi baǵyttar Ádiletti Qazaqstan qurý jolyndaǵy tarıhı qadamdar bolǵanyn basa aıtýymyz kerek.
Túıindeı aıtqanda, Prezıdenttiń osy jolǵy Joldaýy el kútkendi eńserdi. Memleket basshysynyń ókiletti merzimin jeti jylǵa uzarta otyryp, saılaný merzimin bir merzimmen shekteý bastamasy da bılikti monopolııalaý úrdisin retke keltirý múmkindigin tarıh sahnasyna alyp shyqty. Jeti jyl – az merzim emes. Reformalar men baǵdarlamalardy júzege asyrý múmkindigine jetkilikti merzim. Sonymen qatar Prezıdent saılaýy men Parlament saılaýyn merziminen buryn ótkizý máselesi de qoǵam men buqara halyq kútken saıası reformalardyń alǵashqy qadamy.
Infografıkany jasaǵan Amangeldi Qııas, «EQ»
Eski men jańanyń ortasynan jańǵyrý jolyn aıqyndap, jarqyn sátterdiń jarshysyna aınalǵan Joldaý bılik tarmaqtaryna ǵana emes, barsha qazaqstandyqtarǵa tarıhı jaýapkershilik júkteıdi. Saılaýdaǵy tańdaý erkindigin paıdalaný, nashaqorlyq jáne esirtki saýdasyna tosqaýyl bolý, jemqorlyqtyń jolyn kesý sekildi qoǵam serpilisiniń nátıjeleri barshamyzǵa ortaq qundylyq. Memleket basshysy osynsha aýqymdy mindetter mazmunyn ulttyq deńgeıdegi jaýapkershilik sanaı otyryp, ózi úshin de Otannyń damýy men ıgiliginen asqan qundylyq joq ekenin qadap aıtty.
Jańǵyrý, jańarý tabaldyryǵynda turǵan Qazaqstannyń gúldenýi – barshamyzdyń baqýatty tirligimiz. Endeshe, Prezıdent aıtqandaı, «Bir jaǵadan – bas, bir jeńnen – qol shyǵara» otyryp, jarqyn bolashaq úshin jumyla kúreseıik!
Bekzat ALTYNBEKOV,
Amanat partııasy Qaraǵandy oblystyq fılıalynyń atqarýshy hatshysy
Qaraǵandy oblysy
