Vedomstvoda atap ótilgendeı, jańa vızalar Memleket basshysy Qasym-Jomart Toqaevtyń 1 qyrkúıektegi Qazaqstan halqyna Joldaýyn iske asyrý aıasynda paıda bolady. Onda eldiń kóshi-qon saıasatynyń tıimdiligin arttyrý boıynsha jańa sharalar paketi usynylǵan.
«Kóshi-qon saıasatynyń aldaǵy 5 jylǵa arnalǵan jańa tujyrymdamasy sheńberinde respýblıkada sheteldikter úshin erekshe jaǵdaılardy kózdeıtin baǵaly daǵdylar men ınvestısııalyq vızalar úshin arnaıy vızalar engizý kózdeledi», delingen vedomstvo habarlamasynda.
Atap aıtqanda, Qazaqstanǵa úzdik sheteldik mamandardy tartý tetigin ázirleý josparlanýda. Osylaısha, 100 úzdik sheteldik maman óndiriste jumys isteıtin qazaqstandyqtardy daıarlaıdy.
Mundaı mamandar úshin «Baǵaly daǵdylarǵa arnalǵan vıza» engiziledi jáne qazaqstandyq kadrlardy ozyq daıarlaý úshin únemi jańartylyp otyratyn baǵaly daǵdylar reıtıngi qalyptastyrylady.
Sondaı-aq Memleket basshysynyń tapsyrmasyn iske asyrý aıasynda jańa tujyrymdama jobasynda bıznes-ımmıgrasııa tásilderi ózgertiledi.
«EYDU elderiniń tájirıbesin negizge ala otyryp, Qazaqstan ekonomıkasyna bir mezgilde 300 myń AQSh dollaryn ınvestısııalaǵan sheteldik bıznesmender úshin ınvestısııalyq jáne iskerlik vızalar alý sharttaryn qaıta qaraý usynylady. «Investısııalyq vıza» 10 jyldyq turýǵa ruqsat beredi. Vıza ıesi bıznesti tirkeýge, múlikke ıelik etýge, qarjylyq operasııalardy júrgizýge múmkindik alady», deıdi vedomstvo ókilderi.
Osylaısha, Qazaqstanǵa jylyna 100-ge deıin bıznesmen-ınvestor tartylady dep kútilýde.
Sondaı-aq bilim berý ımmıgrasııasyn damytý maqsatynda tujyrymdamada kelesi sharalar kózdeledi:
- sheteldik jetekshi bilim berý mekemelerin akademııalyq utqyrlyq baǵdarlamasyna tartý jáne qos dıplomdy bilim berý praktıkasyn odan ári damytý arqyly eldik bilim berý ınfraqurylymyn keńeıtý;
- suranysqa ıe mamandyqtar boıynsha 100 úzdik oqytýshyny jáne suranysqa ıe tehnologııalar boıynsha ǵalymdardy tartý. Bul rette sheteldik ǵalymdar men oqytýshylar úshin turýǵa yqtııarhat, al keıinnen Qazaqstan azamattyǵyn alý quqyǵyn bere otyryp, uzaq merzimdi (10 jylǵa deıin) «Ǵylymı-pedagogıkalyq vızalar» kózdeledi.
«Osy strategııalyq mindetti iske asyrý elimizdiń joǵary mektep pen ǵylymnyń bedelin, azamattarymyzdyń zııatkerlik jáne shyǵarmashylyq áleýetin arttyrýǵa jáne saıyp kelgende Respýblıkamyzdaǵy adamı kapıtaldyń ınnovasııalyq damýy úshin jaǵdaı jasaýǵa múmkindik beredi», delingen habarlamada.
