Búgin «AMANAT» partııasynyń Tóraǵasy Erlan Qoshanov «Uly dala joryǵy» respýblıkalyq at marafonynyń bastalýyna arnalǵan saltanatty rásimge qatysty.
Ol el Prezıdenti Qasym-Jomart Toqaevtyń quttyqtaý sózin oqyp berdi.
«Bizdiń babalarymyz Uly dala shejiresin tulpardyń tuıaǵymen jazǵan. Búgingi urpaq – sol kóshpendiler mádenıetiniń zańdy murageri. Shyn máninde, qazaq pen jylqy egiz uǵym. Arǵymaq atty halqymyzdyń sımvoly deýge bolady. Biz qazirgi zamannyń jaqsy qasıetterin boıǵa sińire otyryp, ulttyq bolmysymyzdy jańǵyrtýǵa tıispiz. Búgingi báıgeniń basty maqsaty osy. Ár óńirden kelgen shabandozdar keń baıtaq Qazaq dalasyn kókteı ótip, qasıetti Túrkistan qalasyna at basyn tireıdi. Bul – naǵyz azamattar men qazanattar synalatyn doda. Sondaı-aq elimizge rýhanı serpilis ákelip, jastardy otanshyldyqqa baýlıtyn biregeı joba», delingen Memleket basshysynyń quttyqtaýynda.
Marafonǵa qatysýshylarǵa arnaǵan sózinde partııa Tóraǵasy «AMANAT» aldaǵy ýaqytta da at sporty túrleri men basqa da ulttyq sport baǵyttaryn nasıhattaýǵa jáne damytýǵa atsalysatynyn atap ótti.
«Prezıdentimizdiń bastamasymen qazir elimizde aýqymdy ózgerister bolyp jatyr. Biz Ádiletti Qazaqstanǵa bastaıtyn joldyń bastaýynda turmyz. Búgingi joryqtyń osyndaı tarıhı kezeńmen tuspa-tus kelýiniń úlken sımvoldyq máni zor. Bizdiń ulan-ǵaıyr jerimiz bar. Sol keń baıtaq jerdi kesip ótý – ol jigittiń jigitiniń ǵana qolynan keletin jáne attyń aty ǵana shydaıtyn uzaq jol. Sondyqtan jorytqanda joldaryńyz bolsyn»,dedi Erlan Qoshanov óz sózinde.
Ashylý saltanatyna Mádenıet jáne sport mınıstri Dáýren Abaev, qala ákimi Altaı Kólginov, Parlament depýtattary men qoǵam qaıratkerleri qatysty.
Uıymdastyrýshylardyń aıtýynsha, álemdik tájirıbede teńdesi joq bul marafon shabandoz mádenıetin Qazaqstan brendi retinde qalyptastyrýǵa negiz bolady.
18-29 qyrkúıek aralyǵynda marafonshylar elordadan Túrkistan qalasyna deıin 1200 shaqyrymnan asa qashyqtyqty basyp ótedi. Marafon 100 shaqyrymdyq 12 satyǵa bólingen. Elimizdiń árbir óńirinen marafonǵa 1 komandadan qatysady. Marafonǵa qatysýshylarǵa Uly Dala rýhyn sezinýge jáne túrkilerdiń kıeli jerleri – Joshy han, Alasha han keseneleri, sondaı-aq Qazaq handyǵynyń alǵashqy astanasy Sozaq qalasy pen túrki rýhanııatynyń besigi Túrkistan qalasy sııaqty tarıhı oryndarǵa zııarat jasaýǵa múmkindik týady.
Sońǵy meje – Túrkistan qalasyna deıin eń qysqa ýaqyt ishinde jetken komanda músheleri bas júlde – «Uly dala sarbazy» ataǵy men 30000000 teńge kólemindegi júldemen marapattalady. 2-shi jáne 3-shi oryn ıegerleri sáıkesinshe 20000000 teńge jáne 15000000 teńge júldeni qanjyǵaǵa baılaıdy.
Jarys barysynda barlyq qatysýshylar demalys oryny, azyq-túlikpen jáne qajetti medısınalyq kómekpen qamtamasyz etiledi.
Marafon-báıgeni «AMANAT» partııasy, «The Great Steppe Tour» qoǵamdyq qory men Ulttyq sport túrleri qaýymdastyǵy, QR Mádenıet jáne sport mınıstrligi uıymdastyrdy.
