«Eń aldymen Kıorıoshı myrzany BUU Bas Assambleıasy 77-sessııasynyń tóraǵasy qyzmetine saılanýymen quttyqtaımyn. Biz munda – BUU shtab-páterinde adamzat úshin asa mańyzdy kezeńde bas qosyp otyrmyz. Álem geosaıası qaıshylyqtar kúsheıip kele jatqan jańa kezeńge qadam basqan sekildi.
Tártip pen jaýapkershilikke negizdelgen ári buryn qalyptasqan halyqaralyq júıeniń ornyn haos pen boljaýǵa kelmeıtin jaǵdaı basyp otyr. Tejemelik jáne tepe-teńdiktiń jahandyq júıesi beıbitshilik pen turaqtylyqty saqtap qala almady. Qaýipsizdik arhıtektýrasy kelmeske ketip barady», dedi Qazaqstan Prezıdenti.
Onyń aıtýynsha álemdik alpaýyttar arasyndaǵy ózara senimsizdik jyldam arta túsken.
«Álem jańa áskerı qaqtyǵys oshaqtarynyń qurbanyna aınaldy. Biz eki býynnan keıin alǵash ret ıadrolyq qarýdyń qoldanylý qaýpimen betpe-bet keldik. Teketirester jasandy kedergiler men ekonomıkalyq oqshaýlanýǵa ákeledi», dedi Qasym-Jomart Toqaev.
